Navoiyda nogiron shaxsni avval tilanchilik qilishga majburlab, so‘ng vahshiylarcha o‘ldirishdi
Etimlikda ulg‘aygan Ikrom 2016 yildan 2020 yilning aprel oyiga qadar turli manzillarda yashab keldi.
Shu orada sodir etgan o‘g‘rilik jinoyati uchun sudlanib, Navoiy shahar sudining hukmi bilan unga nisbatan tayinlangan ahloq tuzatish ishlari jazosini o‘tayotgan edi. Sudda qilmishiga iqrorlik va pushaymonlik bildirgan bu yigit 20 yoshida undan-da o‘ta og‘ir, ya’ni qasddan odam o‘ldirish jinoyatiga qo‘l urdi.
Ikrom 2020 yilning aprel oylarida yangasi Dilnozaning uyiga yashash uchun ko‘chib boradi. Tog‘asi chamasi yetti yillar ilgari vafot etgan, xonadonda esa yangasi Nigina ismli qizi va uning voyaga yetmagan o‘g‘li bilan birga unga notanish, 1-guruh nogironi bo‘lgan Sardor ismli shaxs ham yashar edi.
Yangasi Dilnoza bolaligidan nogiron, aqli zaif, chap qo‘li va chap oyog‘i yoshligida ko‘mirdan qolgan cho‘qqa yiqilib tushib kuygan Sardorni odamlarning ko‘nglida rahm-shafqat uyg‘otishini nazarda tutib, 2 yildan buyon tilanchilik bilan muntazam shug‘ullanishga majbur qilib kelardi. Tilanchilikdan tushgan mablag‘ esa Dilnoza va uning qizi uchun kunlik ketadigan ehtiyojlarga sarf qilinar edi.
Ikromning o‘zi esa Karmana tumanida plastik idishlarni to‘plab sotib, topgan pulining bir qismini yangasiga ijara uchun berib, shu asnoda kun kechirib yurardi.
Odatda aholi gavjum bozorlar atrofiga tilanchilik qilish uchun olib borilgan Sardor so‘nggi kunlarda bu kabi hayot tarzidan bezdimi, uydan tez-tez chiqib, boshi oqqan tomonga ketadigan, bir oz vaqt o‘tib, o‘zi yana qaytib keladigan odat chiqardi.
Bir kuni Dilnoza qizi Nigina va jiyani Ikromga Sardorni kelgusida uydan qochib ketishining oldini olish, uning tilanchiligi evaziga kelayotgan daromadni saqlab qolish maqsadida uni omborxonaga kiritib, ustidan qulflab qo‘yishlarini buyurdi. Shunday qilib, Sardor 2020 yil 12 iyundan 12 iyulga qadar havo haroratining issiqligi, inson yashashi uchun juda tor, hayoti va sog‘ligi uchun xavfli bo‘lgan kichik omborxonaga ustidan qulflab g‘ayriqonuniy ravishda ozodlikdan mahrum qilingan.
2020 yilning 12 iyul kuni soat 22:00 larda Sardorning baland ovozini eshitib, Nigina bilan Ikrom uning yoniga kiradi. Nogironligi sababli bunday sharoitda ushlab turilgani uchun qiynalgan Sardor ularni haqorat qiladi. Bu haqoratdan g‘azab otiga mingan Nigina va Ikrom Sardorning og‘zini ro‘mol bilan bog‘lab, tashqariga olib chiqadi. Oyog‘ini metall zanjir bilan bog‘lab, o‘roq shaklidagi temir bo‘lagi bilan tanasining orqa va old qorin sohalari, qo‘l va oyoqlariga urib, unga tan jarohatlari yetkazib, qo‘llarini ip bilan bog‘laydi. Ammo nogiron bo‘lishiga qaramasdan Sardor ularga qarshilik ko‘rsatadi. Bundan qattiq g‘azablangan Nigina va Ikrom o‘zaro jinoiy til biriktirib, Sardorni qasddan o‘ldirishni maqsad qiladi.
Ikrom Sardorning qo‘llarini mahkam ushlab turgan bir paytda Nigina oyog‘i bilan uning bo‘yin sohasidan bosib turadi. Natijada Sardor unga yetkazilgan og‘ir tan jarohatlari va yuqori nafas yo‘llarining berkilishi oqibatida voqea joyida vafot etadi.
Sodir etilgan qotillik jinoyatining oqibatidan va javobgarlikdan qutilish maqsadida jinoyat izlarini yashirish uchun ular Sardorning jasadini oq rangli matodan tikilgan qopga solib, “Zarafshon” daryosiga olib borib tashlash, ashyoviy dalillarni esa yo‘q qilish payiga tushadi.
Ular bo‘lgan voqeadan xabardor qilish uchun uxlab yotgan Dilnozani uyg‘otadi. U esa vahimaga tushib, tezroq murdani yo‘qotishni buyuradi va murda solingan xaltani eshak aravaga ortib, jasadni “Zarafshon” daryosiga tashlab yuborishadi. “Bu ishni hech kimga sezdirmay amalga oshirdik, endi murdani suv oqizib ketadi, hech kimsa topa olmaydi”, deb xotirjamlikka berilib, har kungi turmush tarzida davom etishadi.
Qing‘ir ishning qiyig‘i qirq yilda ham chiqadi, deyishadi. Jinoyat ikki kunda fosh bo‘ldi.
Sud majlisida sudlanuvchilar qilgan jinoyatlariga iqrorlik bildirdi. Endigina 20 yoshni qarshilagan Ikrom 17 yil umrini jazoni ijro etish koloniyasida o‘taydi, Nigina esa sud hukmiga ko‘ra 13 yil ozodlikdan mahrum qilindi. Uning otasiz voyaga yetayotgan farzandi endi ona mehridan ham judo bo‘ldi. Sardordan tilanchilikda foydalangan va uni g‘ayriqonuniy ravishda ozodlikdan mahrum qilgan Dilnozaga nisbatan sud tomonidan 5 yil muddatga ozodlikni cheklash jazosi tayinlandi.
Aziza Ro‘ziyeva,
Navoiy viloyati sudi jamoatchilik va OAV bilan aloqalar bo‘yicha bosh konsultanti
