MIB “firibgar”dan ham moddiy zararni undirdi

Har bir inson o‘zining kichkina dunyosi - ya’ni yashaydigan shaxsiy uyi bo‘lishini orzu qiladi. Shu niyatda, Muzrabot tumanida yashaydigan A.T. ham oila qurib, farzandli bo‘lganidan so‘ng, yashash joyi sotib olishni rejalashtiradi.

Tuman markazidagi yangi ko‘p qavatli uylardan birini sotib olish uchun A.T. uy egasi N.T. bilan kelishib, to‘lovning bir qismini amalga oshiradi. Nihoyat, o‘z uyiga ega bo‘ldim, deb xursand bo‘lgan chog‘ida, kutilmagan hodisa yuz beradi - uyning ikkinchi "xaridori" paydo bo‘ladi.

Tekshiruvlar natijasida, N.T. bir uyni ikkita xaridorga va’da qilib, ikkalasidan ham pul olgani ma’lum bo‘ladi. Holat yuzasidan jinoyat ishi qo‘zg‘atilib, sud N.T.ga nisbatan jazo choralarini qo‘llaydi. Jabrlanuvchi A.T. foydasiga esa 70 million so‘m moddiy zarar undirilishi belgilanadi.

Biroq, ijro hujjati bo‘yicha qarzdorlik ixtiyoriy ravishda amalga oshirilmaganligi sababli, Byuroning Muzrabot tuman bo‘limi tomonidan majburiy ijro harakatlari amalga oshirildi va natijada fuqaro foydasiga 70 million so‘m to‘liq undirilishi ta’minlandi.
Fuqaro A.T. buzilgan huquqlari tiklanganidan xursand ekanligini bildirib, boshqalarni uy sotib olishda kerakli hujjatlarni tekshirib, e’tiborli bo‘lishga chaqirdi.