Markaziy bank dori-darmon va oziq-ovqat narxlari keskin oshishi ehtimolidan ogohlantirdi

Go‘sht importi oshayotganiga qaramay, narx qimmatlashi davom etmoqda. Markaziy bank hukumatni hududlarda chorva uchun ozuqa bazasini ko‘paytirish va mahalliy ishlab chiqarish hajmlarini oshirishga chaqirdi.

Kelgusi oylarda pandemiya bilan bog‘liq vaziyatning o‘zgarishi sharoitida dori-darmonlar, tibbiy xizmatlar va asosiy oziq-ovqat mahsulotlari narxlari keskin oshishi mumkin. Markaziy bank hukumatni buning oldini olish bo‘yicha chora ko‘rishga chaqirdi.

Pul bozori regulyatori, shuningdek, karantin bilan bog‘liq cheklovlarning umumiy ovqatlanish, transport va yetkazib berish xizmatlari sohalaridagi narxlarga ta’sirini kamaytirish zarurligini ham qayd etgan.

Bu haqda Markaziy bank Boshqaruvining 29 iyul kungi yig‘ilishida qabul qilingan qarorlar yuzasidan e’lon qilingan rasmiy sharhda so‘z boradi.

MB relizida qayd etilishicha, go‘sht mahsulotlari va qoramollar importi hajmining oshib borishiga qaramay, ichki bozorlarda go‘sht mahsulotlari narxlarining o‘sish dinamikasi saqlanib qoladi. Bu esa hududlarda chorva uchun zaruriy ozuqa bazasini ko‘paytirish va mahalliy ishlab chiqarish hajmlarini oshirish orqali bu mahsulotlarning barqaror taklifini shakllantirish bo‘yicha tizimli ishlarni amalga oshirishni taqozo etadi.

Ta’kidlanishicha, 2021 yilning iyun oyi yakunlari bo‘yicha yillik inflyasiya darajasi may oyida kuzatilgani kabi 10,9 foizni tashkil etib, so‘nggi 4-5 oydan beri deyarli o‘zgarishsiz shakllanmoqda.

Iyun oyida o‘tkazilgan so‘rovlarga ko‘ra, kelgusi 12 oy uchun aholining inflyasion kutilmalari 16,3 foizni tashkil etib, mart oyiga nisbatan 0,8 foiz bandga o‘sdi. Inflyasiya ham, inflyasion kutilmalar ham yuqori darajada qolayotgani hamda ularning asosiy oziq-ovqat mahsulotlari narxlari o‘zgarishiga ta’siri kattaligi inflyasion vaziyatni kuchaytirishi mumkin.