Mahkum sog‘lig‘i tufayli o‘talmagan jazo muddatidan ozod qilindi
Xabaringiz bor, joriy yilning 15 iyul kuni Ombudsmanning Qoraqalpog‘iston Respublikasidagi mintaqaviy vakili tomonidan Qo‘ng‘irot tumanidagi 27-son Manzil koloniyasiga amalga oshirilgan monitoring tashrifi davomida mazkur koloniyadan Qo‘ng‘irot tuman Tibbiyot birlashmasining xirurgiya bo‘limiga yotqizilgan mahkum J.Q.ning ahvolidan xabar olib, uning sog‘lig‘ida jiddiy muammolar borligi bois, shu kunning o‘zida bemor Nukus shahridagi respublika ixtisoslashtirilgan Onkologiya va radiologiya tibbiyot markaziga davolanishi uchun yotqizilgan edi.
Shuningdek, Mintaqaviy vakilning so‘roviga asosan, 27-son Manzil koloniya ma’muriyati tomonidan O‘zbekiston Respublikasi IIV Tibbiyot boshqarmasi va boshqa komissiya a’zolari ishtirokida mahkum J.Q. joriy yilning 26 iyul kuni tekshiruvdan o‘tkazildi. Tekshiruv xulosasida mahkumga “Sch s/z grudnogo otdela pishevoda ekzofitiya f.rosta. Laparotomiya, nalojeniye gastrostomi” tashhisi qo‘yildi.
Shundan kelib chiqib, O‘zbekiston Respublikasining Ichki ishlar va Sog‘liqni saqlash vazirliklarining 12/9-sonli qo‘shma Qarori bilan tasdiqlangan “Mahkumlarni kasalligi tufayli jazoni o‘tashdan ozod qilishga taqdim etish uchun asos bo‘ladigan kasalliklar ro‘yxati”ning 2.1-bandiga asosan mahkumning o‘talmagan jazo muddatini o‘tashdan ozod qilish bo‘yicha Jinoyat ishlari bo‘yicha Qo‘ng‘irot tuman sudiga Ombudsmanning iltimosnomasi va koloniya ma’muriyati tomonidan taqdimnoma kiritildi.
Jinoyat ishlari bo‘yicha Qo‘ng‘irot tuman sudining joriy yilning 26 iyul kungi ajrimi asosida mahkum J.Q og‘ir kasallikka chalinganligi tufayli Ӯzbekiston Respublikasi Jinoyat kodeksining 75-moddasiga asosan ozodlikdan mahrum qilish jazosining o‘talmagan jazo muddatidan ozod qilindi.
Ma’lumot uchun: Ӯzbekiston Respublikasi Jinoyat Kodeksining 75-moddasiga muvofiq, hukm chiqarilganidan keyin o‘z harakatlarining ahamiyatini anglay olmaydigan yoki ularni boshqara olmaydigan tarzda ruhiy holatining buzilishi yuzaga kelgan shaxs, shuningdek jazoni o‘tashga to‘sqinlik qiladigan boshqa og‘ir kasallikka chalingan shaxs jazoni o‘tashdan ozod qilinishi belgilangan.
