Kredit mablag‘larini o‘zlashtirgan shirkat rahbarining kirdikorlari fosh etildi

Bosh prokuratura huzuridagi Departamentning Sariosiyo tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda, “I” xususiy uy-joy mulkdorlari shirkati rahbari O.A. ko‘p qavatli uy-joylarda joriy ta’mirlash va qurilish ishlarini amalga oshirish uchun ajratilgan 2,9 mlrd so‘m kredit mablag‘ining 525,2 mln so‘mini shartnomada ko‘rasatilgan maqsadlarda foydalanmasdan bank filialiga soxta hujjatlarni taqdim etish orqali talon-toroj qilganligi aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.