Karantinda oltinli tosh qazib chiqarayotgan 26 nafar buxorolikka hukm o‘qildi

Uchquduq tuman ma’muriy sudida O‘zbekiston Respublikasi Ma’muriy javobgarlik to‘g‘risidagi kodeksining 54-moddasi (epidemiyalarga qarshi kurashish qoidalarini buzish), 165-moddasi (faoliyat bilan lisenziyasiz va boshqa ruxsat beruvchi hujjatlarsiz shug‘ullanish) hamda 195-moddasi (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) da nazarda tutilgan ma’muriy huquqbuzarliklar harakatlari bo‘yicha Buxoro viloyatining Shofirkon tumanida yashovchi 26 nafar fukaroga nisbatan yuritilgan ma’muriy ish ko‘rib chiqildi. Bu haqda O‘zbekiston Respublikasi Oliy sudi matbuot xizmati" xabar tarqatdi.

Aniqlanishicha, ushbu fuqarolar respublikamiz hududida karantin e’lon qilingan bo‘lishiga qaramasdan, 2020 yil 6 aprel kuni niqobsiz bo‘lib, karantin tufayli belgilangan majburiy qoidalarini buzishgan hamda tegishli tartibda ruxsati bo‘lmasdan, Uchquduq tumanidagi qo‘riqlanmaydigan konlardan tarkibida oltin zarrasi bo‘lgan toshlarni qazib chiqarishayotganligi aniqlangan. Shuningdek, ichki ishlar organlari xodimlarining talablariga bo‘ysunmasdan, qochib ketish haqida bir-biriga aytib, ichki ishlar organlari xodimlarining o‘z xizmat vazifalarini bajarish bo‘yicha qonuniy talablarini bajarmaslikka da’vat etishib, voqea joyidan yashirinishga harakat qilishgan.

Sud bu fuqarolarning aybi, ular bergan ko‘rsatmalaridan tashqari bildirgi, ish bo‘yicha olingan tushuntirish xatlari, ashyoviy dallilar hamda ish bo‘yicha to‘plangan boshqa hujjatlar bilan o‘z tasdig‘ini topgan deb hisobladi.

Uchquduq tuman ma’muriy sudining 2020 yil 7 apreldagi qarori bilan 26 nafar huquqbuzarlarga ma’muriy qamoq va jarima jazolari tayinlangan.