Fumio Kisida 50 ta yapon kompaniyasini Markaziy Osiyoga olib kelmoqda

9 avgust kuni Yaponiya Bosh vaziri Fumio Kisida Markaziy Osiyoga tashrif buyuradi va unga turli sohalardagi 50 ta kompaniya vakillaridan iborat katta delegasiya hamrohlik qilmoqda. Fumio Kisida Qozog‘iston va O‘zbekistonga tashrif buyuradi, ikki davlat rahbarlari bilan uchrashadi, mintaqaviy sammitda ishtirok etadi va boshqa muzokaralar o‘tkazadi.

Yaponiya kompaniyalari Markaziy Osiyo firmalari bilan yangi shartnomalar imzolashni kutmoqda. Hamkorlikning asosiy yo‘nalishlari dekarbonizasiya, raqamli sog‘liqni saqlash xizmatlari va boshqa ilg‘or texnologiyalarni joriy etishdir. Yaponiya Yapon kompaniyalarini Markaziy Osiyoga faol sarmoya kiritishga undash uchun sug‘urta qoplamasini yo‘lga qo‘ymoqchi. 300 milliard iyen miqdorida besh yillik kredit liniyasi ochiladi.

Tokio strategik foydali qazilmalarga boy mintaqaga global qiziqishning sezilarli darajada ortishi fonida Markaziy Osiyodagi sa’y-harakatlarini kuchaytirmoqda. Eslatib o‘tamiz, Markaziy Osiyo davlatlari rahbarlari 8-10 avgust kunlari Ostonada yig‘ilishadi. U yerda mintaqa prezidentlarining yillik maslahat uchrashuvi va “Markaziy Osiyo+Yaponiya” sammiti bo‘lib o‘tadi.