Erta qarish sindromiga chalingan erkak 28 yoshida vafot etdi

Erta qarishga olib keladigan irsiy kasallik – progeriyaga chalingan italiyalik Semmi Basso 28 yoshida vafot etdi. U mazkur kasalligi bor odamlar orasida eng uzoq umr ko‘rdi.

Bu haqda Italiyaning ushbu kasallikka qarshi kurash assosiasiyasi ma’lum qildi, uning asoschilari Bassoning o‘zi va uning ota-onasidir.

Basso 1995 yilda Italiyaning Skio shahrida tug‘ilgan. Ikki yoshida unga progeriyaning bolalik shakli bo‘lgan Xatchinson – Gilford sindromi tashxisi qo‘yilgan. Kasallik haqida ma’lumot yo‘qligi Bassoning ota-onasini unga qarshi kurashadigan uyushma – l’Associazione Italiana Progeria assosiasiyasini tuzishga undadi, uning faoliyatida bemorning o‘zi ham ishtirok etdi.

Semmi Basso ota-onasi va eng yaqin do‘sti bilan Chikagodan Los-Anjelesga US 66 yo‘li bo‘ylab qilgan sayohati haqida National Geographicda hujjatli film chiqqanidan keyin mashhur bo‘ldi. Shuningdek, u tez-tez televizorda chiqishlar qilib, kasalligi haqida intervyular berdi.

2018 yilda Basso Padua universitetini tabiiy fanlar bo‘yicha tamomlagan. Progeriyani genetik muhandislik yordamida davolash imkoniyatlari mavzusida nomzodlik dissertasiyasini himoya qildi.

2019 yilda Bassoda aorta klapanini almashtirish operasiyasi o‘tkazildi – bu progeriya bilan og‘rigan bemorda o‘tkazilgan bunday turdagi ilk operasiya. Shundan so‘ng u Italiyaning oliy – “Italiya Respublikasi oldidagi xizmatlari uchun” ordeni kavaleriga aylandi. Ikki yil o‘tgach, Basso progeriyani o‘rganishga qaratilgan yana bir dissertasiyani himoya qildi.

Xatchinson – Gilford progeriyasi har 20 million odamda uchraydigan, kam kuzatiladigan irsiy kasallikdir.

Progeriyada teri va ichki organlar o‘zgaradi, shuning uchun bemorlar o‘z yoshiga nisbatan kattaroq ko‘rinadi. Kasallik oqibatida hayot sifati ham pasayadi. Davolashsiz umr ko‘rish davomiyligi taxminan 13 yil, deb xabar beradi rbc.ru.