Eron atrofidagi urush yana to‘xtatildi: tomonlar harbiy harakatlarni vaqtincha to‘xtatganini e’lon qildi

Eron va Isroil o‘rtasidagi navbatdagi keskinlikdan so‘ng har ikki tomon harbiy harakatlarni to‘xtatishini ma’lum qildi. Bu Eronning Isroilga raketa hujumi va Isroilning Eron hududidagi nishonlarga zarbalari ortidan sodir bo‘ldi.

Yakshanba kuni kechqurun Eron Isroilning shimoliga bir nechta raketa uchirdi. Tehron bu harakatni Isroilning Bayrut shahriga bergan zarbalariga javob deb atadi. Isroil esa Livandagi amaliyotlari «Hizbulloh» kuchlariga qarshi qaratilganini bildirmoqda.

Eron hujumidan keyin Isroil barcha raketalar havoda yo‘q qilinganini ma’lum qildi. Shundan so‘ng Isroil harbiy-havo kuchlari Eronning g‘arbiy va markaziy hududlaridagi harbiy ob’ektlarga, shuningdek, mamlakat janubi-g‘arbidagi Mahshar neft-kimyo majmuasiga zarbalar bergani haqida xabarlar tarqaldi.

Dushanba kuni Isroil mudofaa armiyasi Eron tomonidan yangi hujumlar qayd etilganini ma’lum qildi. Shuningdek, Yamandagi Eron tomonidan qo‘llab-quvvatlanadigan husiylar ham raketa uchirgani aytildi.

Eron Islom inqilobi qo‘riqchilari korpusi Isroilning Nevatim va Tel-Nof aviabazalariga zarba berilganini ma’lum qildi. Tehron bu harakatni Eron hududidagi bir nechta radiolokasiya stansiyalariga qilingan hujum uchun javob sifatida baholadi.

Kunning ikkinchi yarmiga kelib, Eron Qurolli kuchlari Bosh shtabi harbiy operasiyalar to‘xtatilganini e’lon qildi. Biroq, bayonotda agar hujumlar, jumladan Janubiy Livanda ham davom etsa, javob choralari avvalgidan ham qattiqroq bo‘lishi ogohlantirildi.

Oradan ko‘p o‘tmay Isroil ham Eron nishonlariga qarshi hujumlarni to‘xtatayotganini ma’lum qildi. Mahalliy ommaviy axborot vositalari bu qaror AQSh prezidenti Donald Trampning murojaatidan keyin qabul qilinganini xabar qildi.

Shu bilan birga, Isroil harbiylari Livan hududidan yana uchta raketa uchirilganini qayd etdi. Raketalarning bir qismi tutib qolingan, qolganlaridan biri aholi yashamaydigan hududga tushgan. Hodisada jabrlanganlar yo‘q.

Ommaviy axborot vositalari Donald Tramp va Isroil bosh vaziri Binyamin Netanyahu telefon orqali muloqot qilganini xabar qildi. Suhbat tafsilotlari oshkor etilmagan.

Tramp avvalroq Eron va Isroilni zudlik bilan o‘t ochishni to‘xtatishga chaqirgan hamda tomonlar tez orada sulhga erishishi mumkinligini aytgan edi.

Shu bilan birga, tahlilchilar fikricha, harbiy harakatlar vaqtincha to‘xtagan bo‘lsa-da, mojaroning to‘liq hal etilgani haqida gapirish hali erta. Tomonlar o‘rtasidagi ziddiyat saqlanib qolmoqda va yangi keskinlik xavfi hamon yuqori bo‘lib turibdi.

Eron prezidenti Mas’ud Pezeshkiyon esa mamlakat «na jang maydonidan, na muzokaralar stoli ortidan chekinmasligini» ta’kidlab, milliy xavfsizlik va tinchlikni ta’minlash Eron uchun asosiy ustuvor vazifa bo‘lib qolishini bildirdi.