ECHL: “Bavariya” va “Barselona”da g‘alaba, “Manchester Siti”da yana muammolar...

Futbol bo‘yicha Yevropa Chempionlar ligasining 5-turi doirasidagi birinchi kungi bahslar bo‘lib o‘tdi.

Mazkur turning dastlabki o‘yinida “Sparta Praga” jamoasi o‘z maydonida Madridning “Atletiko” klubiga qarshi o‘yin o‘tkazdi va 0:6 hisobida imkoniyatni boy berib qo‘ydi. “Slovan Bratislava” va “Milan” klublari o‘rtasidagi bahsda Milan shahri jamoasi 2:3 hisobida muhim g‘alabani qo‘lga kiritdi.

Chempionlar ligasidagi so‘nggi o‘yinlarda 3 tadan ko‘p gol urayotgan “Barselona” bu tur uchrashuvida ham o‘z an’anasiga sodiq qoldi. Aniqroq aytadigan bo‘lsak, Kataloniya klubi navbatdagi raqibi “Brest” jamoasini 3:0 hisobida taslim qildi. Uchrashuvdagi gollarga Robert Levandovski va Dani Olmo mualliflik qildi.

Shuni ta’kidlab o‘tish lozimki, Robert Levandovski “Brest” jamoasiga urgan gollari hisobiga Chempionlar ligasida 100 ta gol urgan uchinchi o‘yinchiga aylandi. Avval bu ko‘rsatkichga faqat Krishtianu Ronaldu va Lionel Messi erishgan edi. Hozirda uning gollari soni 101 taga yetdi. Levandovski ayni damda musobaqada 7 ta gol urgan holda to‘purarlar ro‘yxatida karvonboshilik qilmoqda.

Turdan-turga o‘zini tiklab olayotgan “Bavariya” klubi “Allianz Arena” stadionida “PSJ” bilan raqobatlashdi. Uchrashuvning 38-daqiqasida Kim Min Jaye o‘yindagi hisobni ochdi va bu gol o‘yin yakuniga qadar saqlanib qoldi. Shu tariqa “Bavariya” 1:0 hisobida g‘alaba qozondi hamda muhim 3 ochkoni o‘z hisobiga qo‘shib qo‘ydi. Ushbu klubdan farqli o‘laroq “Manchester Siti” turdan-turga ochko yo‘qotishda davom etmoqda. O‘tgan turdagi mag‘lubiyatdan so‘ng “MS” “Etihad Stadium”da “Feyenoord” bilan 3:3 hisobida jangovar durang qayd etdi.

London shahri sharafini himoya qiladigan “Arsenal” jamoasi ushbu turda “Sporting” mehmoni bo‘ldi. Uchrashuvda “Arsenal” klubi 1:5 hisobida zafar quchib, yirik g‘alaba qayd etdi. Shuningdek, Chempionlar ligasining 5-turida “Inter” – “RB Leypsig” 1:0, “Bayer 04” – “Zalsburg” 5:0, “Yang Boyz” – “Atalanta” 1:6 natijalari qayd etildi.

Chempionlar ligasida bugun tunda mazkur tur doirasidagi quyidagi bahslar bo‘lib o‘tadi:

22:45 – “Srvena Zvezda” – “Shtutgart” ;

22:45 – “Shturm” – “Jirona”;

01:00 – “Dinamo Zagreb” – “Borussiya D” ;

01:00 – “Liverpul” – “Real Madrid” ;

01:00 – “Aston Villa” – “Yuventus” ;

01:00 – “Monako” – “Benfika” ;

01:00 – “Seltik” – “Bryugge” ;

01:00 – “PSV” – “Shaxtyor” ;

01:00 – “Bolonya” – “Lill”.