“Bu meni xatom, ming marta uzr so‘rayman” — Andijonda viloyat hokimi o‘rinbosari noqonuniy uy qurilishiga ruxsat bergani uchun aholidan uzr so‘radi

Andijon shahridagi 3-kichik daha 1-uyda yashovchi fuqarolar bolalar maydonchasiga mo‘ljallangan yerda noma’lum tadbirkor tomonidan 7 qavatli uy qurilayotgani haqida Andijon viloyati hokimligiga murojaat qilgan. bu haqda Daryo.uz yozmoqda.

Qayd etilishicha, aholi ularning roziligini olmay noqonuniy qurilish bo‘layotgani haqida bir necha marotaba hokimlikka arz qilgan. Quruvchi tashkilot 19 noyabr kuni ichimlik suvi tarmog‘i quviriga zarar yetkazgan va buning natijasida daha suvsiz qolgan. Mahalla ahli hokimlikka yana o‘z etirozlarini bildirgan.

Andijon viloyati hokimining matbuot kotibi Muslim Ibrohimovning ma’lum qilishicha, murojaatdan so‘ng viloyat rahbari ko‘rsatmasiga asosan, ichimlik suvi bo‘yicha nosozlikni bartaraf etish uchun ish jarayoni tashkil etilgan va qurilish jarayoni yaqindan o‘rganilgan.

“Qurilish ishlarida bir nechta holatlar bo‘yicha xatoliklar aniqlanib, jumladan, tegishli qarorga to‘liq rioya etilmagani, maydon uy-joy qurish uchun ajratilmagani, kadastr ro‘yxatidan o‘tkazishda kamchiliklarga yo‘l qo‘yilgani, eng asosiysi, mahalliy aholiga ushbu qurilish noqulaylik tug‘dirayotgani sababli, qurilish jarayoni to‘xtatildi”, — deyiladi matbuot kotibi axborotida.

Taqdim etilgan videoda ko‘rinishicha, yarim tunda Andijon viloyati hokimining o‘rinbosari Maxamadjon Nishonov norozi aholi bilan uchrashgan. U qurilishga ruxsat berish jarayonida xatolikka yo‘l qo‘ygani uchun odamlardan uzr so‘ragan.

“Hujjatni qilib berganmiz, lekin bu bizni xatomiz. Mahallaning avvalgi raisi “Hamma rozi, odamlar rosa xursand bo‘ladi”, degandi.

Bu meni xatom. Viloyatimiz hokimi odamlarni norozi qilib ish qil demaydi. Menga topshiriq bergan: borib, o‘rganib, o‘sha yerda ishlar qonuniy bo‘lsa, qildirib bering degan.

O‘tgan safar kelganimda sizlar norozi bo‘lganlaringizda, bo‘ldi, sizlar norozi bo‘lsanglar, qurilish bo‘lmaydi, deb ketganman. Ming marta uzr so‘rayman. Agar sizlar rozi bo‘lmasalaring qurilish bo‘lmaydi”, degan Maxamadjon Nishonov.

Viloyat hokimligi axborotida, xatolikka yo‘l qo‘ygan, ya’ni noqonuniy qurilish uchun hujjatlarni rasmiylashtirib bergan mutasaddilarga qanday chora ko‘rilgani haqida ma’lumot berilmagan.