«Bu bayonot mening fikrimga munosib javob bo‘ldi» — Putin

Yaqinda Vladimir Putin Rossiya uchun AQSh prezidentligi lavozimida Tramp emas, balki Baydenning qolishi foydaliroq ekanligini aytgan edi. Uning so‘zlariga ko‘ra, Jo Bayden o‘z bayonoti bilan uning ushbu gaplariga ayni kerakli — "adekvat reaksiya" bildirdi.

Putin VGTRK muxbiri Pavel Zarubinga bu borada shunday dedi:

"Biz siz bilan bu haqda yaqinda gaplashgandik, siz mendan AQShning bo‘lajak prezidenti sifatida kimni afzal ko‘rishimni so‘ragandingiz. Men o‘shanda, har qanday prezident bilan ishlashga tayyorligimizni, lekin biz, ya’ni Rossiya uchun — aynan Bayden nomzodi afzalroq ekanligini aytdim.

Va uning hozirgi gaplariga qarab aytishim mumkinki, men mutlaqo haq edim. Tushunaman, u hech qachon menga: "Volodya, rahmat senga, menga ko‘p yordam berding", — deb ayta olmaydi. Men ham o‘z navbatida o‘sha fikrimni amerikaliklar uchun emas, balki o‘z tomoshabinlarimiz uchun aytgan edim", — deya ta’kidladi Putin.

Putin, so‘zini yakunlar ekan, Rossiya uchun Trampdan ko‘ra Baydenning AQSh prezidenti bo‘lib qolishi foydaliroq ekanligi to‘g‘risidagi fikrini o‘zgartirmasligini qo‘shimcha qildi.