Britaniya suvlarida rus kemasi aniqlangach, Buyuk Britaniya Putinni ogohlantirdi: "Biz seni ko‘rib turibmiz"

Buyuk Britaniya mudofaa vaziri Jon Xili chorshanba kuni Rossiya prezidenti Vladimir Putinga ogohlantirish berdi. Bunga sabab, shu hafta boshida Britaniya suvlariga rus josus kemasining kirib kelgani haqidagi xabar bo‘ldi.

Buyuk Britaniya parlamentida bu voqea haqida so‘zlar ekan, Xili Putinga qarata shunday dedi: "Biz seni ko‘rib turibmiz. Nima qilayotganingizni bilamiz. Va biz bu mamlakatni himoya qilish uchun qat’iy choralar ko‘rishdan cho‘chimaymiz."

Xili Rossiyaning Yantar kemasini "Buyuk Britaniyaning muhim suv osti infratuzilmasi haqida ma’lumot to‘plash va uni xaritalashda" aybladi.

U, shuningdek, kema Rossiya Mudofaa vazirligi tasarrufida ekanligini ta’kidlab, uning Buyuk Britaniya suvlarida paydo bo‘lishini "Rossiyaning tobora kuchayib borayotgan tajovuzkorligining yana bir namunasi" deb atadi.

Xilining aytishicha, Yantar birinchi marta Buyuk Britaniya suvlariga dushanba kuni kirgan bo‘lib, o‘shanda Britaniya harbiy-dengiz kuchlari uni Britaniya qirg‘og‘idan taxminan 45 dengiz mili uzoqlikda aniqlagan.

U yana qo‘shimcha qilishicha, "harbiy kemalarimiz Yantarga yaqinroq bo‘lishi va uni yaxshiroq kuzatishi uchun Qirollik harbiy-dengiz flotining jangovar qoidalarini o‘zgartirgan. Hozirgacha kema xalqaro kemalar qatnovi qoidalariga rioya qilgan".

Xili aytishicha, o‘shandan beri rus kemasi yo‘lini davom ettirgan va hozirda Shimoliy dengizda joylashgan.