BAA Ramazonda amal qiladigan cheklovlarni e’lon qildi
Birlashgan Arab Amirliklari Sog‘liqni saqlash vaziri Abdulrahmon Uvays koronavirus tufayli Ramazon oyida amal qiladigan cheklovlar va profilaktika choralarini e’lon qildi.
Vazirning bildirishicha, shu paytgacha aholining 52 foizdan ortig‘i, jumladan, keksalarning 70 foizdan ziyodi koronavirusga qarshi emlandi, mamlakatdagi 205 ta tibbiyot markazida 7 million dozaga yaqin vaksina ishlatildi. BAA hukumati joriy yilning to‘rtinchi choragiga qadar aholining barini emlashni rejalashtirgan.
Joriy yilning 13 aprelidan e’tiboran BAA aholisi va mehmonlariga chodirlarda to‘planish va bir-birlari bilan taom almashishi taqiqlanyapti. Iftorlarni katta qilib o‘tkazish, ko‘chada taom tarqatish ham mumkin emas.
Bundan tashqari, masjidlarda namozdan avval va keyin dezinfeksiya o‘tkaziladi. Qur’onni raqamli formatda o‘qishga to‘g‘ri keladi, bosma Qur’onni tarqatish taqiqlandi.
The National nashrining yozishicha, Ramazon davomida muntazam ravishda tekshiruvlar o‘tkaziladi va qoidabuzarlar jarimaga tortiladi. Ramazonning oxirgi 10 kunligida cheklovlar qaytadan ko‘rib chiqiladi.
