Avval 5 yilga qamalgan "Toshissiqquvvati" xodimi yana firibgarlikka qo‘l urdi

“Ko‘r hassasini bir marotaba yo‘qotadi”, deyishadi. Biroq 26 yoshli “Toshissiqquvvati” DUKning filiallaridan birida kompyuter texnigi vazifasida ishlagan xodim takroran firibgarlik jinoyatiga qo‘l urdi...

Eng qizig‘i, birinchi gal firibgarlik jinoyatiga qo‘l urganida 5 yil muddatga ozodlikdan mahrum qilish jazosi tayinlangandi. Lekin bu jazo tegishli xulosa chiqarish uchun yetarli bo‘lmagan ko‘rinadi. Yo‘qsa, yana xuddi o‘sha “yo‘l”dan yurishni lozim toparmidi?!

Sudlanuvchi o‘zganing mulkini firibgarlik yo‘li bilan qo‘lga kiritish maqsadida bir emas, ikki emas naq 34 nafar shaxsning ishonchini suiiste’mol qiladi.

U 2019 yilning bahoridan 2020 yilning so‘ngiga qadar, “Toshissiqquvvati” DUKning filiallaridan birida ishlagan. Ilk “o‘lja”siga issiq suv uchun to‘lanishi lozim bo‘lgan jami 1 100 000 so‘m pullarni kassa orqali uning xisob raqamiga to‘lab qo‘yishni va’da beradi. Undan naqd pullarni olib, mazkur summaga kvitansiya yozib beradi. Ammo bergan va’dasini bajarmay, pullarni o‘z ehtiyojiga sarflab yuboradi.

“Qahramon”imiz hojatbarorlikni davom ettirib, yana bir fuqarodan issiq suv uchun to‘lanishi lozim bo‘lgan jami 2 428 000 so‘m pullarni olib, doimgidek kvitansiya yozib beradi. Bu gal ham pulni cho‘ntakka uradi.

Shu tariqa, kimdandir 600 000 so‘m, boshqasidan 3 200 000 so‘m, yana birovdan 5 000 000 so‘m, jami esa 51 026 000 so‘m pullarni olib, hamma fuqaroga olgan summasi uchun kvitansiya yozib beravergan. Lekin tarki odat – amri mahol deganlaridek birorta fuqaro nomidan kassa orqali ularning hisob raqamiga pul to‘lanmagan. Tabiiyki sudlanuvchi bergan va’dasini bajarmay, pullarni o‘z ehtiyojiga sarflab yuborgan.

Sudlanuvchi sud majlisida aybiga qisman iqrorlik bildirdi.

— Haqiqatdan ham issiqlik tarqatish bo‘limida kompyuter texnigi vazifasida ishlaganman. Bo‘lim boshlig‘ining topshirig‘iga ko‘ra, fuqarolardan naqd pul qabul qilib olingan. So‘ng naqd pullarni bo‘lim boshlig‘im va boshqa shaxslar bilan bo‘lishib, o‘zlashtirganmiz. Olingan pullarning bir qismini men o‘zlashtirganman, qolganini bo‘lim boshlig‘i va uning yordamchilari o‘zlashtirgan, - deya qilmishidan chin ko‘ngildan pushaymonligini, oilaviy sharoitini inobatga olib, yengilroq jazo tayinlashni so‘radi.

“ETKAZILGAN ZARARNI UNDIRIB BERISHNI SO‘RAYMAN”

Jabrlanuvchilardan biri sud majlisida quyidagilarni bayon qildi:

— 2019 yilning noyabrida tuman issiqlik tarqatish bo‘limiga issiqlik ta’minotidan bo‘lgan qarzimni to‘lash uchun bordim. Kassasi yonida o‘tirgan sudlanuvchi kompyuter orqali ko‘rib, 1 620 000 so‘m qarzdorligim borligini aytdi. Unga naqd pul berdim, to‘lov to‘langanligini tasdiqlovchi kvitansiya to‘ldirib berdi. Shu bilan 2020 yilning noyabrida yana to‘lov uchun bordim. Yana o‘sha xodim 1 580 000 so‘m to‘lashim kerakligini aytdi, naqd pul berdim. To‘lov to‘laganligini tasdiqlovchi kvitansiya berdi. Biroq uyimga tuman issiqlik tarqatish bo‘limidan qarzdorlik xaqida xatlar kela boshladi. Bo‘limga borganimda esa to‘langan jami 3 200 000 so‘m kassaga kirim qilmaganini bildim. Suddan yetkazilgan zararni undirib berishni so‘rayman.

FIRIBGARGA QANDAY JAZO TAYINLANDI?

Sudlanuvchi Jinoyat kodeksining 168-moddasi (firibgarlik) 3-qismining “b” bandida nazarda tutilgan jinoyatni sodir etganlikda aybli deb topildi. Unga JK 59-moddasi 8-qismi tartibida sudning hukmi bilan avval tayinlangan jazoning o‘talmagan qismini qisman qo‘shish yo‘li bilan uzil-kesil o‘tash uchun 2 yil muddatga muayyan huquqdan, ya’ni korxona, muassasa va tashkilotlarda moddiy javobgarlik yuklatilgan vazifalarda ishlash huquqidan mahrum qilingan holda 6 yil muddatga ozodlikdan mahrum qilish jazosi tayinlandi.

Sudlanuvchidan 34 nafar jabrlanuvchilar foydasiga yetkazilgan moddiy zarar undirilishi belgilandi.

Zoxiddin Nuriddinov,

jinoyat ishlari bo‘yicha Olmazor tuman sudi sudyasi