Andijonning "zamhokimi" nega javobgarlikdan qochmoqda? Unga islohotlar begonami?
So‘nggi yillarda yurtimizning har bir nuqtasida keng ko‘lamli qurilish va bunyodkorlik ishlari amalga oshirilmoqda. Ayniqsa aholining uy-joyga bo‘lgan talabini qondirish maqsadida qurilish ishlarining hajmi yildan-yil ortmoqda. Albatta, bu quvonarli hol. Ammo, nadomatlar bilan aytishimiz mumkinki, imoratlarni qurilishida vaqtida ko‘plab, uzoq yillik daraxtlarning kesilish yoki nobud bo‘lish holatlari kuzatilmoqda. Mana shunday holatlarni oldini olish, davlat fondiga kirmaydigan daraxt va butalarni saqlab qolish maqsadida moratoriy joriy qilingan.
Shunday holatlar bo‘ladiki, ayrim daraxt va butalarni kesish lozim bo‘lib qoladi. Kesib tashlay desa, moratoriyga amal qilmaganlarga jazo bor.
Xo‘sh, bunday holatlarda nima qilish mumkin?
Vazirlar Mahkamasining 2018 yil 31 martdagi qarori bilan tasdiqlangan davlat xizmatlari ko‘rsatishning ma’muriy reglamentiga asosan tuman (shahar) hokimliklari davlat ekologiya va atrof-muhitni muhofaza qilish qo‘mitasi organlarining xulosalariga asosan Davlat o‘rmon fondiga kirmaydigan daraxtlar va butalarni kesish ruxsatnomalar berishi belgilangan. Ushbu xizmatdan yuridik va jismoniy shaxslar Davlat xizmatlari markazi yoki yagona interaktiv davlat xizmatlari portali orqali murojaat qilishlari mumkin. Shundan so‘ng ularning arizalari tuman (shahar) hokimligiga va Davlat ekologiya qo‘mitasiga yuboriladi. Ekologiya qo‘mitasi 5 ish kun mobaynida daraxtlar va butalarning holatini, shuningdek, ularning kesilishi bo‘yicha muvofiqligini o‘rganadi. Xulosalarini tegishli hokimlik organlariga yuboradi. Xokimlik 1 ish kuni mobaynida Davlat ekologiya qo‘mitasi organining ijobiy xulosasi mavjud bo‘lganda ruxsatnomani berish uchun to‘lov to‘langanidan so‘ng ruxsatnomani rasmiylashtirib, tasdiqlaydi. Ruxsatnomani DXMga yoki ariza beruvchiga YAIDXP orqali yuborishni ta’minlaydi. Qayd etish lozimki, ushbu Reglament talablari buzilishida aybdor bo‘lgan shaxslar qonun hujjatlarida belgilangan tartibda javob berishlari lozim.
Ma’lumotlarga ko‘ra, Andijon shahar hokimligiga 2020 yilning iyul oyidan 2021 yilning oktyabr oyiga qadar davlat o‘rmon fondiga kirmaydigan daraxtlar va butalarni kesishga ruxsatnoma berishni so‘rab, , jami 80 dan ortiq murojaat kelib tushgan.
Afsuski, Davlat xizmatlari agentligi viloyat boshqarmasi tomonidan o‘tkazilgan monitoring va o‘rganishlar davomida Andijon shahar hokimligining ushbu davlat xizmatini ko‘rsatish uchun mas’ul xodimlarining e’tiborsizligi hamda shahar hokimining Sanoatni rivojlantirish, kapital qurilish, kommunikasiyalar va kommunal xo‘jalik masalalari bo‘yicha o‘rinbosari Dilmurod To‘raqulovning yetarli nazorat o‘rnatmaganligi natijasida reglament talablari muntazam ravishda qo‘pol tarzda buzilib kelinayotganligi aniqlangan. Ya’ni, aksariyat arizalar murojaat qilinganidan keyin oradan 8-9 oy o‘tib, Agentlik aralashuvi bilan ijro etish holatlari kuzatilgan.
Misol uchun, Andijon pedagogika kollejining 2020 yil 23 iyuldagi, Mudofaa ishlari boshqarmasining 2020 yil 12 avgustdagi, Mehnat bosh boshqarmasining 2020 yil 18 dekabrdagi, "BEXRUZBEK GRAND" MCHJning 2020 yil 10 sentyabrdagi, fuqaro S. Qahharovning 2020 yil 4 noyabrdagi murojaatlari joriy yilning 28-30 aprel kunlari ko‘rib chiqilgan. Shuningdek, Andijon shahridagi Bolalar shaharchasining 2021 yil 5 martdagi arizasiga ham oradan ikki oy o‘tib javob berilgan. Afsuski, bunday huquqbuzarlikni sodir etish holatlari hanuzgacha davom etmoqda.
Aniqlangan holatlar bo‘yicha D. To‘raqulov Ma’muriy Javobgarlik to‘g‘risidagi Kodeksning 2155-moddasiga asosan DXA viloyat boshqarmasiga chaqirilgan. Biroq, ushbu mansabdor shaxs javobgarlikdan qochib, chaqiruv xatiga asosan kelmayotgani ma’lum bo‘ldi.
Qonun barcha uchun barobar, deyishadi. Ammo, Andijon shahar hokimining o‘rinbosari javobgarlikdan qochmoqda. Nahotki, prezident komandasida ishlayotgan D. To‘raqulov davlat rahbarining islohotlariga oyoq qo‘ysa.
Umidjon Mamarasulov,
DXA viloyat boshqarmasi
axborot xizmati xodimi
