Alloh O‘z huzurida yod olsin desangiz

Shafoatgo‘yimiz Rasululloh sollallohu alayhi vasallam: “Din nasihatdir”, degan hadislariga binoan quyidagi narsalarni sizlarga ilindik.

Bo‘sh vaqtingizni savobi ulug‘, xotirada qolishi juda oson bo‘lgan zikrlar bilan o‘tkazing. Zero, oxiratda bo‘sh vaqtlarimizni qanday o‘tkazganimiz haqida so‘ralamiz. Siz bir narsani doimo yodda tuting!

Sizni o‘zingizdan katta lavozimdagi inson ismingizni tilga olsa, qay darajada xursand bo‘lasiz. Agar bu butun olamlarni yo‘qdan bor qilgan va butun olamlar Parvardigori Alloh taolo bo‘lsachi?!

Axir, Alloh taolo Qur’oni Karimda shunday marhamat qilgan: “Bas, Meni eslangiz, Men ham sizlarni eslayman va Menga shukr qilingiz va Meni inkor qilmangiz!” (Baqara surasi 152-oyat)

Ha, agar sizni butun olamlar Parvardigori bo‘lgan Alloh taolo eslashini xohlasangiz, shu ondayoq zikr qilishni boshlang. Alloh taoloni bir jamoa huzurida eslasangiz, Alloh taolo ham sizni u jamoadan yaxshi bo‘lgan jamoa xuzurida eslaydi.

Banda uchun bundan ortiq baxt bormi!?

Bo‘sh vaqtdan unumli foydalaning! Hali savol javob kuni bor!!!

Bo‘sh vaqtingizni tilga oson bo‘lgan zikrlar bilan o‘tkazing.

Ushbu zikrlar uchun alohida vaqt ajratish shart emas. Yo‘lda, biror ish bilan shug‘ullanayotgan vaqtingizda aytsangiz ham bo‘ladi.

سبحان الله وبحمده ،سبحان الله العظيم

O‘qilishi: Subhanallohi va bihamdihi, Subhanallohil aziym

Ma’nosi: Allohni hamd aytish va ulug‘lash bilan poklayman.

Ushbu so‘zning fazilati: Rasululloh sollallohu alayhi vasallam: Kim “Subhanallohi va bihamdihi”ni bir kunda yuz marotaba aytsa, undan xatolari o‘chirilib yuboriladi. Garchi dengiz ko‘pigicha bo‘lsa ham (Imom Buxoriy va Imom Muslim rivoyat qilganlar).

Rasululloh sollallohu alayhi vasallam: “Rahmonga suyukli, tilga yengil (aytishga), tarozuda og‘ir keladigan ikki so‘z bor. Ular: “Subhanallohi va bihamdihi, Subhanallohil aziym”, – dedilar (Imom Buxoriy va Imom Muslim rivoyat qilganlar).

Rasululloh sollallohu alayhi vasallam: “Kim Subhanallohil azim va bihamdihi” desa, unga jannatda bir xurmo ekiladi”, – dedilar (Imom Termiziy rivoyati).

Rasululloh sollallohu alayhi vasallam: “Alloh taolo uchun so‘zlarning eng yaxshisi “Subhanallohi va bihamdihi”, – dedilar (Imom Muslim rivoyat qilganlar).

 سبحان الله والحمد لله ولا إله إلا الله و الله أكبر

O‘qilishi: Subhanallohi valhamdu lillahi va la ilaha illallohu vallohu akbar.

Ma’nosi: Alloh barcha nuqsonlardan pokdir. Allohga hamd bo‘lsin, Allohdan o‘zga iloh yo‘q, Alloh ulug‘dir.

Ushbu so‘zning fazli: Rasululloh sollallohu alayhi vasallam: “Mening “Subhanallohi valhamdu lillahi va la ilaha illallohu vallohu akbar” deyishim menga quyosh chiqishidan yaxshiroqdir” dedilar  (Imom Muslim rivoyat qilganlar).

Rasululloh sollallohu alayhi vasallam: “Alloh taologa so‘zlarning eng suyuklisi to‘rttadir. Ularni qaysi biri bilan boshlasang ham zarari yo‘q. Ular «Subhanallohi valhamdu lillahi va la ilaha illallohu vallohu akbar”», – dedilar (Imom Muslim rivoyat qilganlar).

Rasululloh sollallohu alayhi vasallam: “Isro kechasida Ibrohim alayhissalomga yo‘liqdim. U zot: “Ey Muhammad sollallohu alayhi vasallam ummatingga mendan salom aytgin va ularga jannatning tuprog‘i pok, suvi shirin va o‘zi tekis, o‘simligi “Subhanallohi valhamdu lillahi va la ilaha illallohu vallohu akbar” ekanini xabarini bergin dedilar”», – deb marhamat qildilar (Imom Termiziy rivoyat qilganlar).

Rasululloh sollallohu alayhi vasallam: “Birortangiz har kuni mingta yaxshilik kasb qila olishdan ojizmi?” – dedilar. O‘tirganlardan biri: “Mingta yaxshilikni qanday qila olish mumkin?” – dedi. Rasululloh sollallohu alayhi vasallam: “Yuzta tasbeh aytsa, mingta yaxshilik yozilib, mingta xatosi o‘chiriladi”, – dedilar (Imom Muslim rivoyat qilganlar).

Rasululloh sollallohu alayhi vasallam: “Daraxt o‘z barglarini to‘kkani kabi “Subhanallohi valhamdu lillahi va la ilaha illallohu vallohu akbar” kalimasi ham xatolarni to‘kadi”, – deb marhamat qildilar.

لا إله إلا الله وحده لا شريك له  له الملك وله الحمد

وهو على كل شيء قدير

O‘qilishi: “Laa ilaaha illallohu, vahdahu laa shariyka lahu, lahul mulku va lahul hamdu va huva alaa kulli shayin qodiyr”

Ma’nosi: Allohdan boshqa iloh yo‘q, U yolg‘iz, Uning sherigi ham yo‘q, butun olam mulki Uniki, butun Hamdu sano Unga xos va U xar bir narsaga qodirdir.

Ushbu so‘zning fazli: Rasululloh sollallohu alayhi vasallam: “Kim  Laa ilaaha illallohu, vahdahu laa shariyka lahu, lahul mulku va lahul hamdu va huva alaa kulli shayin qodiyr, deb bir kunda yuz marotaba aytsa, o‘nta qul ozod qilgan barobarida savob oladi. Unga yuzta yaxshi amal yoziladi. Yuzta yomonlik o‘chiriladi. bu (ishi) unga o‘sha kuni shaytondan saqlanish bo‘ladi. To kech kirgunga qadar shaytondan omonda bo‘ladi. Uning bu amalidan afzalroq ishni hech kim qila olmaydi. Faqat undan ko‘proq ushbu kalimani aytgan kishi o‘zib ketadi”, – deb marhamat qildilar (Imom Buxoriy va Muslim rivoyat qilganlar).

                  لا حول ولا قوة الا بالله

O‘qilishi: Laa havla va laa quvvata illa billah

Ma’nosi: Alloh taolodan boshqa o‘zgartiruvchi na kuch, na qudrat bor.

Ushbu so‘zning fazli: Rasululloh sollallohu alayhi vasallam Abu Muso roziyallohu anhuga qilgan nasihatlarida: “Seni Jannat xazinalaridan biriga dalolat qilaymi?” – dedilar. Abu Muso al- Ashariy roziyallohu anhu: “Ha, ayting, yo Rasululloh!» Rasululloh sollallohu alayhi vasallam: “Laa havla va laa quvvata illa billah”, – dedilar (Imom Buxoriy va Imom Muslim rivoyat qilganlar).

أستغفر الله وأتوب إليه

O‘qilishi: Astag‘firulloha va atubu ilayhi

Ma’nosi: Allohga istig‘for aytib tavba qilaman.

Ushbu so‘zning fazli: Rasululloh sollallohu alayhi vasallam: “Kimni sahifasida istig‘fori ko‘p bo‘lsa,  najot topadi”, – dedilar (Imom ibn Mojja rivoyat qilganlar).

Rasululloh sollallohu alayhi vasallam: “Kimni sahifasi xursand qilishini xohlasa, istig‘forni ko‘paytirsin”, – dedilar (Imom Bayhaqiy rivoyat qilganlar).

Rasululloh sollallohu alayhi vasallam: “Ey ayollar jamoasi,  sadaqa qilinglar va istig‘forni ko‘paytiringlar. Men sizlarni ko‘plaringizni do‘zahda ko‘rdim”, – dedilar (Imom Muslim rivoyat qilganlar).

Rasululloh sollallohu alayhi vasallam: “Allohga qasamki, albatta,  men Alloh taologa bir kunda yetmish martadan ko‘p istig‘for aytib, tavba qilaman”, – dedilar.

الصلاة على النبي صلى الله عليه وسلم

Ma’nosi: Rasululloh sollallohu alayhi vasallamga salavot aytish.

Ushbu so‘zning fazli: Rasululloh sollallohu alayhi vasallam: “Kim menga bir marotaba salavot aytsa, Alloh taolo unga o‘n marotaba salavot aytadi”, – dedilar (Imom Muslim rivoyat qilganlar).

Rasululloh sollallohu alayhi vasallam: “Kim menga bir marotaba salavot aytsa, Alloh taolo unga o‘n marotaba salavot aytadi. Undan o‘nta xatosini o‘chiradi. Martabasini o‘n daraja ko‘taradi”, – dedilar (Imom Ahmad rivoyat qilganlar).

Eslatma: Salavotlar ichida eng yaxshisi namozda “Attahiyot”dan keyin aytiladigan salavotdir.

Manba: fitrat. uz