G‘azo shifoxonalarida yopilish xavfi: 3 soat ichida yonilg‘i tugashi mumkin

G‘azoda joylashgan “Al-Shifa” shifoxonasi direktori Muhammad Abu Silmiya ta’kidlashicha, shiddatli yonilg‘i yetishmovchiligi tufayli shahardagi barcha shifoxonalar 3 soat ichida faoliyatini to‘xtatishi mumkin.

U bu haqda izrailliklar tomonidan davom etayotgan harbiy hujumlar va yopiq blokada sharoitida o‘tkazilgan matbuot anjumanida ma’lum qildi.

“Yonilg‘ining keskin yetishmasligi butun sog‘liqni saqlash tizimi, shifoxonalar va suv tozalash stansiyalarining ishlashini xavf ostiga qo‘ymoqda”, — dedi Abu Silmiya.

Uning so‘zlariga ko‘ra, yonilg‘i inqirozi suv ta’minoti va tuzsizlashtirish uskunalariga ham ta’sir ko‘rsatmoqda va bu G‘azo sektoridagi gumanitar inqirozni yanada kuchaytiradi.

Abu Silmiya ta’kidladiki, generatorlar uchun yonilg‘i yetishmasligi bir necha bor ma’lum qilingan bo‘lsa-da, Isroil shifoxonalarga yonilg‘ini cheklangan miqdorda yetkazib berish siyosatini davom ettirmoqda.

“Agar vaziyat o‘zgarmasa, 3 soat ichida ‘Al-Shifa’ shifoxonasi hamda boshqa barcha tibbiyot muassasalari o‘z faoliyatini to‘xtatadi. Biz allaqachon dializ bo‘limini yopishga majbur bo‘ldik, chunki qolgan resurslarni reanimasiya va operasiya xonalarida ishlatish shart — u yerlarda elektr ta’minoti to‘xtashga haqqi yo‘q”, — deya qo‘shimcha qildi u.

Mazkur vaziyat G‘azo sektoridagi tibbiy xizmatlarning butunlay izdan chiqishiga olib kelishi mumkin.