Урушни ўрганиш бўйича Америка институти: Россия ҳукумати босиб олинган ҳудудлар аҳолисининг қаршилигига дуч келмоқда
Урушни ўрганиш бўйича Америка институти 15 июнь куни урушдаги вазият юзасидан янги хулосасини эълон қилди, унда сўнгги кунларда Россия қўшинлари Украина жанубида Украина Қуролли Кучларининг эҳтимолий қарши ҳужумларига тайёргарлик кўриш учун мудофаа операцияларига диққатни жамлашда давом этгани таъкидланади.
Хабар қилинишича, Запорожье вилоятининг босиб олинган қисмида россияликлар қўшимча гуруҳлаш ишларини олиб бормоқда: улар Днепрорудныйдаги ўз позицияларини Қримдан келган техникалар билан мустаҳкамламоқда ва Васильевка-Орехово-Гуляйполе линиясидаги операцияларни қўллаб-қувватлаш учун Васильевка ҳудудида қайта тўпланмоқда.
Николаев вилоятида Украина кучлари Очаков қирғоқ чизиғининг муҳим қисми устидан назоратни сақлаб турибди ва Қора денгиз портларига чиқиш назоратини кучайтириш ниятида бўлган Россия кемаларини қайтариши мумкин.
Бундан ташқари, институтнинг қайд этишича, Россия расмийлари босиб олинган ҳудудларда ўз дастурларини амалга оширишда қийинчиликларга дуч келишда давом этмоқда. 9 ва 11 июнь кунлари Мариуполда номаълум украиналик партизанлар Россия Фавқулодда вазиятлар вазирлиги ходимларини таъқиб қилишгани хабар қилинди.
Бердянскдаги мактабларнинг қайта очилиши рус тилидаги дастурларни ўқитишдан бош тортган украиналик ўқитувчиларнинг қаршилиги туфайли қийинлашмоқда.
Украинапараст бўлган бундай ҳаракатлар Россиянинг босиб олинган ҳудудлар устидан тўлиқ маъмурий назоратни мустаҳкамлашга қаратилган саъй-ҳаракатларини ва Россияни аннекция қилиш режаларини бузишда давом этиши мумкин.
