Тўрабек Ҳабибуллаев Олимпия лицензияси учун илк жангини ўтказади

Аввал хабар берганимиздек, Италияда “Париж-2024” Олимпия ўйинларининг бокс беллашувлари учун йўлланма берувчи I Жаҳон квалификацион турнири ўтказилмоқда.

Мусобақанинг бугунги беллашувларида биргина чарм қўлқоп устамиз иштирок этади. Аниқроғи, вазни 80 килограммгача бўлган Тўрабек Ҳабибуллаев Олимпиада лицензияси учун ўтадиган илк баҳсда Ҳуссейн Иашишга (Иордания) қарши рингга кўтарилади.

Маълумот учун, кечаги беллашувларда терма жамоамиз аъзолари иштирок этмади. Бугун рингга кўтариладиган Тўрабек Ҳабибуллаев жангги Тошкент вақти билан соат 23:00 дан сўнг бошланади. I Жаҳон квалификацион турнири 11 март кунига қадар давом этади.