Ўзбекистон U23 терма жамоаси Париж олимпиадасига Канадалик ўзбекни олиб бормоқчи
![Ўзбекистон U23 терма жамоаси Париж олимпиадасига Канадалик ўзбекни олиб бормоқчи Ўзбекистон U23 терма жамоаси Париж олимпиадасига Канадалик ўзбекни олиб бормоқчи](/photos/news/EEeaLn1Dnm7hXtw.jpeg)
Гап Камрон Ҳабибуллоҳ ҳақида кетмоқда. Камрон 2003 йил 23 октябрь куни Тошкентда туғилган. Миллати — ўзбек. Кейинчалик эса оиласи билан Канадага кўчиб кетиб, шу мамлакат фуқаролигини олган.
Твиттерда "Scout in Eurasia" профили эгаси хабар беришича, футболчи 17 ёшида Канаданинг «Ванкувер Уайткэпс» клуби сафида MLS чемпионатида дебют қилган.
Ҳабибуллоҳ «Спортинг Канзас Сити II» клуби сафида MLS Next Pro чемпионати доирасида 7 та ўйинда майдонга тушиб, 7 та гол урган.
Камрон Канада U17 терма жамоаси сафида КОНКАКАФ U17 чемпионати ва U17 жаҳон кубогида қатнашиб, 3 гол ва 3 ассист муаллифи бўлган.
Шунингдек, у Канада U20 терма жамоаси сафида КОНКАКАФ U20 чемпионатида доирасида 3 та ўйинда майдонга тушиб, 1 та гол урган. Камрон ушбу ёш тоифасида жамоа сафида 2 та ўртоқлик ўйинида ҳам майдонга тушган.
Ижобий хислатлари: техникаси яхши, яхши дриблинг эгаси, тўп билан яхши муомала қилади.
Твиттердаги "Afghan Football" профили эгаси ёзишича, Камрон Ҳабибуллоҳ асли афғонистонлик ўзбек бўлиб, унинг оиласи Афғонистоннинг Фароб вилоятида яшаган.
Камрон Ўзбекистон миллий терма жамоасида ўйнаши учун аввал ФИФАнинг рухсатини олиш талаб этилади. ЎФА Париж-2024 олимпиадасигача ушбу рухсатни олишга улгурармикан? Кўрамиз.