Раул Кастро Куба Коммунистик партияси раҳбарлигидан кетишини маълум қилди
Кубалик сиёсатчи ва давлат арбоби Раул Кастро Куба Коммунистик партияси Марказий қўмитасининг биринчи котиби лавозимидан кетишини маълум қилган. Бу ҳақда Лотин Aмерикаси оммавий ахборот воситалари хабар бермоқда.
Кастро Куба Коммунистик партиясининг қурултойидаги нутқи пайтида, партияни бошқаришни ёш авлодга топширишини айтган. Унга кўра, Кастро шу ҳафта охирида партия бошқарувидан кетиши мумкин.
Шундай қилиб, 60 йил ичида биринчи марта Кастролар сулоласининг вакиллари партияда раҳбарлик лавозимларини эгалламаслиги кутилмоқда.
Раул Кастронинг акаси, кубалик инқилобчи ва сиёсатчи Фидел Кастро 1959 йилда ҳокимиятга келди. Соғлиғи сабабли, 2006 йилда у барча лавозимларидаги вазифаларини бажаришни укаси Раулга топширди. Фидел Кастро 2016 йил 25 ноябрда ҳаётдан кўз юмди.
2011 йилда Раул Кастро расман Куба Коммунистик партияси Марказий қўмитасининг биринчи котиби этиб сайланди. 2016 йилда у иккинчи муддатга қайта сайланди.
Партиянинг саккизинчи қурултойи тўрт кун, 19 апрелга қадар давом этади. Душанба куни Кастронинг лавозими унинг ворисига ўтади. Ушбу лавозимни мамлакатнинг амалдаги президенти Мигел Диас-Канел эгаллаги кутилмоқда.
Экспертларга кўра, Кастро ҳатто лавозимидан кетганидан кейин ҳам Кубанинг сиёсий элитаси устидан сезиларли таъсирини сақлаб қолиши мумкин.
Раул Кастро 2018 йилда Куба Давлат Кенгаши ва Вазирлар Кенгаши раҳбарлигидан кетиб, мамлакат Коммунистик партиясининг этакчиси бўлган эди. Aввалроқ, у ушбу лавозимни 2021 йилда тарк етиш нияти борлигини маълум қилган эди.
