Навоийда фоҳишахона ташкил қилган шахс жазога тортилди
Давлатимиз томонидан пандемия шароитида фуқароларимизнинг уйда қолишлари, карантин қоидаларига риоя қилишлари лозимлиги ҳар куни оммавий ахборот воситалари орқали такрор ва такрор уқтирилиб келинаётган бўлса-да, айрим фуқароларимиз чекловларга амал қилиш кераклиги у ёқда турсин, балки ўзларининг қинғир ишларини, енгил-елпи пул топиш илинжида жиноятга қўл уриб келаётганлиги ачинарли ҳолдир.
Навоий вилояти Хатирчи туман судида Ўзбекистон Республикаси ЖК 131-моддасининг 2-қисми (Фоҳишахона ташкил этиш) билан айбланган М.га нисбатан жиноят иши кўриб чиқилди.
Иш ҳужжатларига кўра, судланувчи М. 2020 йилнинг 12 июнь куни соат таҳминан 16:00ларда ғаразли ёки бошқа паст ниятларда отаси У.нинг Хатирчи туманидаги яшаш хонадонида моддий манфаатдорлик кўриш мақсадида 1994 йилда туғилган И. билан 1980 йилда туғилган Қ. ни жинсий алоқада бўлиши учун шароит яратиб бериб, эвазига фуқаро И. дан 100.000 сўм пулларни олиб фоҳишахона ташкил қилганлиги Хатирчи тумани ИИБ ЖҚБ ходимлари томонидан ўтказилган тезкор-профилактик тадбирда аниқланиб, 100.000 минг сўм пуллар холислар иштирокида далилий ашё тариқасида хужжатлаштириб олинган.
Судланувчи суд мажлисида айбига тўлиқ иқрор ва пушаймонлик билдириб, оилавий шароити оғирлиги сабабли ушбу жиноятни қилишга мажбур бўлганини, оиласидан ажрашганини, бу ҳолатни бошқа такрорламаслигини билдириб қонуний енгиллик беришни сўраган.
Гарчанд, судланувчи М. айбига иқрор ва пушаймонлик билдирган бўлса-да, унинг айби судда муҳокама қилинган ва ҳуқуқий баҳо берилган объектив далиллар билан тўлиқ исботланади.
Суд, судланувчи М.га нисбатан жазо тайинлашда Ўзбекистон Республикаси Олий суди Пленумининг 2006 йил 3 февралдаги “Судлар томонидан жиноят учун жазо тайинлаш амалиёти тўғрисида”ги 1-сонли қарорининг 3-бандида “Жиноят кодексининг 8,54-моддалари мазмунига кўра, жазо адолатли бўлиши, ҳар бир ҳолатда индивидуал тайинланиши, жиноятнинг хусусияти ва ижтимоий хавфлилик даражасига, айбдорнинг шахсига, шунингдек, жазони енгиллаштирувчи ва оғирлаштирувчи ҳолатларга мувофиқ бўлиши керак” деб кўрсатилган раҳбарий кўрсатмаларидан келиб чиқиб, М.нинг содир этган жиноятининг хусусияти ва ижтимоий хавфлилик даражасини, муқаддам судланмаганлигини, унинг айбига тўлиқ иқрорлигини, қилмишидан чин кўнгилдан пушаймонлигини инобатга олиб, у айбли деб топилаётган ЖК 131-моддасининг 2-қисми санкциясида назарда тутилган бир йил озодликни чеклаш жазоси тайинлашни, шунингдек судланувчи зиммасига куннинг кеч соат 22:00 дан эрталаб соат 06:00 га қадар яшаш жойидан чиқиб кетмаслик; ИИБнинг розилигисиз яшаш ва иш жойини ўзгартирмаслик, тегишли маъмурий ҳудуддан ташқарига чиқмаслик; ҳар ойда бир марта Хатирчи туман ИИО Пробация гуруҳидан рўйхатдан ўтиб туриш каби чекловлар белгиланди.
Бекзод Бахринов,
Жиноят ишлари бўйича Навоий вилоят суди
малака ҳайъати котиби
