Навалнийга қарши янги иш бўйича суд 31 май куни бошланиши мумкин

Россия расмийларига кўра, Алексей Навалний қамоқда бўлган вақтида содир этган жиноятлар бўйича суд 31 май куни бошланади. Россиялик мухолифатчи Twitter’да Бош прокуратура унга 3828 саҳифали айблов хулосасини тақдим этганини айтди.

Шу билан бирга, айбловларнинг моҳиятини "аниқлаб бўлмаяпти", чунки колония маъмурияти ишни олиб қўйган, деб ёзади сиёсатчи. "ЖИЗОда бу тақиқланган нарса", деб тушунтирди у. “Сизни нимада айблашаётганини фақат ҳукм чиқарилгач билиб оласиз”, дея киноя қилди мухолифатчи.

Сиёсатчининг сўзларига кўра, янги айбловлар бўйича у 30 йилгача озодликдан маҳрум этилиши мумкин. Навалний 2022 йил октябрида “терроризмни тарғиб қилиш”, “экстремистик фаолиятни молиялаштириш” ва “нацизмни реабилитация қилиш” моддалари бўйича янги иш қўзғатилганини маълум қилди.

2023 йил апрелида “терроризм” моддаси бўйича иш мавжуд бўлганидан – “экстремизм” моддаси бўйича ишдан ажратилгани маълум бўлди.