Германиянинг Золинген шаҳридаги ҳужумда гумонланувчи ҳибсга олинди
"Германиянинг ғарбий қисмида фестивал иштирокчиларига пичоқ билан ҳужум уюштирганликда гумон қилинган шахс расмийларга таслим бўлди", деб хабар берди Ички ишлар вазирлиги. Ушбу ҳужум натижасида уч киши ҳалок бўлди, саккиз киши яраланди. Вазирлик маълумотига кўра, ҳибсга олинган шахсга қарши далиллар бор.
Der Spiegel журналининг ёзишича, гумонланувчи 26 ёшли суриялик бўлиб, 2022 йил охирида Германияга келган ва мамлакатдан бошпана сўраб мурожаат қилган. "Илгари у немис хавфсизлик хизматлари эътиборига тушмаган", дея таъкидлайди нашр.
Аввалроқ полиция шаҳардаги қочқинлар учун мўлжалланган ётоқхоналардан бирида операция ўтказган эди. Рейддан аввал қочқинлар ётоқхонасида яшаган қирғизистонлик 15 ёшли бола қўлга олинган. Нашрнинг ёзишича, у ҳужумнинг бевосита ижрочиси билан мулоқот қилган бўлиши мумкин. Бу ҳақда полицияга унинг жиноятчи билан суҳбатини эшитган икки аёл хабар берган.
