Фарғонада Ўзбекистонда ягона бўлган 300 гектарлик малина плантацияси барпо этилмоқда
Фарғона вилоятининг Фарғона тумани Водил Қизилқўрғон массивида 300 гектар ҳудудда малина етиштириш лойиҳаси амалга киришилди. Бу ҳақида Фарғона вилоят ҳокимлиги ахборот хизмати «Fargonaliklar24.uz»га хабар берди.
Малина етиштириш плантацияси Ўзбекистонда деярли йўқ. Фарғона вилояти биринчилардан бўлиб ушбу лойиҳани амалий ҳаётга тақдим этмоқда.
19-октябрь куни вилоят ҳокими Хайрулло Бозоров Фарғона туманида бўлиб малина плантациясини ташкил этиш бўйича режалаштирилган ишларга старт берди.
Плантация ташкил этмоқчи бўлган фермер, деҳқон хўжаликлари, томорқа ер эгалари ҳамда, ушбу лойиҳада йирик инвестициялар билан иштирок этиш истагида бўлган тадбиркорлар билан мулоқот қилди.
Суҳбат давомида Туркиялик тадбиркор Расим Кичар вилоят ҳокимига лойиҳасини тақдим этиб, Туркиянинг малина етиштиришга ихтисошлаштирилган Мерсин вилоятидан тикансиз кўчатларни олиб келиш ва уларни маҳаллийлаштиришни, анъанавий усуллардан воз кечган ҳолда 3 метр оралиқда малина қаторларини жойлаштиришни қайд этиб ўтди.
Хабар қилинишича, бугунги кунда маҳаллий малина етиштирувчиларда ҳосилдорлик 5-8 тоннани ташкил этган. Агар замонавий агротехник усуллардан фойдаланилса ушбу кўрсаткични 25 тоннагача етказиш мумкинлиги айтилади.
Хайрулло Бозаров ҳудуддаги асосий муаммолардан бири бўлган суғориш масаласига ҳам эътибор қаратиб бу масалани ижобий ҳал этди. Бурғулаш ишларини олиб бориш орқали вертикал суғориш тизимини йўлга қўйиш, сув чиқариш бўйича ўз таклифларини бериб ўтди
Бунда ҳар бир қазилган вертикал суғориш қудуқларини (скважинани) бурғулаш ва ишга тушириш билан боғлиқ харажатларнинг 70 фоизи, бироқ 120 миллион сўмдан ошмаган қисми фермер, деҳқон хўжаликлари ва томорқа ер эгалари кенгаши томонидан субсидия билан қоплаб берилади. Шунингдек вилоят раҳбарининг кўрсатмаси билан плантация ташкил этилиши режалаштирилган ҳудуд бўйлаб электр симёғочлари ўрнатилиб, кабеллаштирилиши таъминлананадиган бўлди.
