Эрдўған Туркиядаги президентлик сайлови санаси ўзгариши мумкинлигини айтди
Туркия Президенти Ражаб Тойиб Эрдўған Анталияда бўлиб ўтган йиғилишда мамлакатда бўлиб ўтадиган навбатдаги президентлик сайловлари ўтказиладиган санани кечиктириш имкониятини тан олди. Бу ҳақда РИА Новости хабар берди.
Туркияда навбатдаги умумий сайловлар – ҳам президентлик, ҳам парламент сайловлари 2023 йил 18 июнь куни бўлиб ўтиши режалаштирилган эди. Бироқ Эрдўған “мавсумий шароитларни ҳисобга олган ҳолда” сайловларни бошқа санага кўчиришга рухсат берганди.
“2023 йилги сайловлар демократик Туркия тарихидаги энг муҳим сайловлардан биридир. Биз сайловларга узоқ вақтдан бери тайёргарлик кўрдик, унинг санасини бироз кўчиришимиз мумкин. Бошқалар ўзларининг ички жанжаллари билан вақтни беҳуда ўтказаётганда, биз мамлакатимиз ва халқимиз учун кўрсатиладиган хизматларнинг энг майда деталларигача эътибор бериш устида ишлаяпмиз”, деди Туркия президенти.
Туркияда умумий (президент ва парламент) сайловлар, маҳаллий қонунларга кўра, бир кунда ўтказилади. Ҳукмрон Халқ альянси аввалроқ уларнинг ягона номзоди амалдаги президент Эрдўған бўлишини эълон қилган эди.
Мухолифат аввалроқ Туркиянинг амалдаги президенти сайловларда қатнаша олмаслигини, чунки бу унинг учинчи муддати бўлишини айтган эди.
Адлия вазирлиги раҳбари бўлажак президентлик сайловлари Эрдўған учун Туркия 2018 йилда парламент бошқарувидан президентлик бошқарув шаклига ўтганидан кейинги иккинчи сайлов бўлишини бир неча бор таъкидлаган.
Туркия конституцияси 101-моддасига кўра, мамлакат Президенти 40 ёшга тўлган, олий маълумотли ва парламент депутатлигига сайланиш ҳуқуқига эга Туркия фуқаролари орасидан тўғридан тўғри халқ томонидан сайланади.
