Эквадорда комендантлик соати жорий этилди

Эквадор президенти Ленин Морено мамлакат пойтахти – Кито шаҳрида комендантлик соати жорий этди. Бу ҳақида мамлакат президенти ўзининг “Тwиттер”даги саҳифасида маълум қилди.

Кито ва унинг атрофида комендантлик соати ҳамда ҳарбий назорат маҳаллий вақт билан соат 15:00 дан амал қила бошлади. “Бу ҳаддан ташқари зўравонлик кўринишларига қарши ҳуқуқни муҳофаза қилиш органларининг ҳаракатларига ёрдам беради”, – дея тушунтирган Морено.

3 октябрдан бошлаб Эквадорда Ленин Моренонинг фармони билан дизел ёқилғиси ва бензин учун субсидиялар бекор қилинди, шу сабаб нархлар, тахминан, 120 фоизга ошди. Бу эса мамлакатда норозилик ва тартибсизликларни келтириб чиқарди. Шундан сўнг Морено мамлакатда фавқулодда ҳолат эълон қилди.

Тартибсизликлар натижасида 77 киши тан жароҳати олди ва бир тинч фуқаро ҳалок бўлди. Шунингдек, 477 киши ҳибсга олинган.