Байденнинг рейтинги пастлади. Бу АҚШ тарихидаги энг ёмон кўрсаткич
АҚШ президенти Жо Байден мамлакатни бошқараётганининг илк 100 кунида, унинг фаолияти америкаликлар томонидан маъқулланиши рейтинги 52 фоизни ташкил қилди. Таъкидланишича, бу АҚШ тарихидаги энг паст кўрсаткичлардан бири ҳисобланади.
1945 йилдан бери фақатгина икки президент — Жеральд Форд (48 фоиз) ва Дональд Трамп (42 фоиз) рейтинглари бундан пастроқ бўлган.
Post ва ABC News ўтказган тадқиқот натижаларига кўра, респондентларнинг 52 фоизи «шак-шубҳасиз» ёки «маълум даражада» Байденнинг фаолиятини маъқуллайди. 42 фоиз респондент бу ҳақда яхши фикрда эмасликларини маълум қилган.
Сўралганлардан 64 фоизи АҚШ президентининг коронавирусга қарши олиб бораётган сиёсатини, 52 фоизи иқтисодий сиёсатини маъқуллаган. Шу билан бирга, сўралганларнинг 37 фоизи Байденнинг Мексика чегарасидаги миграция инқирози бўйича ҳаракатларини қўллаб-қувватлашини билдирган.
60 фоиз респондент демократ Байден Конгрессда республикачилар томонидан қўллаб-қувватловга эга бўлиши кераклигини, 30 фоизи эса президент бусиз ҳам мустақил ҳаракат қила олишини айтган.
Байденнинг иқтисодиётни жонлантиришга қаратилган чоралар пакетини 65 фоиз респондент қўллаб-қувватлаган, 31 фоизи унга қарши чиққан. АҚШ президентининг инфратузилмавий лойиҳаларга 2 трлн доллар йўналтириш қарорини сўралганларнинг 52 фоизи маъқуллаган, 35 фоизи эса салбий фикр билдирган.
Телефон орқали сўровнома 18—21 апрель кунлари инглиз ва испан тилларида ўтказилган. Унда 1007 респондент иштирок этган.
