Байден Эронга қарши санкцияларни бекор қилишни таклиф қилди
АҚШ президенти Жо Байден Эронга Доналд Трамп томонидан Ислом Республикасига қарши қўйилган санкцияларнинг маълум қисмини бекор қилиш таклифини берди. У Эрон билан битимга келишиш тарафдори эканини айтмоқда.
Хабарларга кўра, Вашингтон маъмурияти терроризм, ракета ишлаб чиқариш ва инсон ҳуқуқларини бузиш билан боғлиқ киритган санкцияларни бекор қилишга тайёр.
Хусусан, Эронга жаҳон молия тизимига кириш ва доллар билан операцияларни амалга ошириш имконияти берилиши мумкин, дея ёзмоқда AП нашри.
Шунингдек, Байден нефт сектори, марказий банк, саноат ва қурилиш компаниялари ҳамда молия секторига қарши қўлланган санкцияларни ҳам олиб ташлашни кўриб чиқмоқда.
Ушбу хабар «The Wall Street Journal» дипломатик манбалари томонидан тасдиқланган. Аниқ бўлишича, миллий нефт ва танкер компаниялари, шунингдек иқтисодиётнинг бир қатор муҳим тармоқлари, шу жумладан металлургия чекловлардан чиқарилиши мумкин.
Эслатиб ўтиш жоиз, 2019 йилда Трамп Теҳронга қарши амалдаги нефт эмбаргосини тиклади ва мамлакатда ишлаб чиқаришни деярли ярмига (кунига 3,8 дан 2 миллион баррелгача) пасайтирди. Бу эса экспортни деярли нолга етказган.
Эрон ишлаб чиқариш соҳасини зудлик билан тиклай олмаса керак.
FGE Energy берган маълумотга кўра, Теҳрон қирғоқдан силжиган танкерларда 54 миллион бочка тўплаган ва яна 60 миллиони қуруқликдаги омборхоналарга қуйилган. AҚШ Энергетика вазирлиги эса Эрон дунёдаги нефт захираларининг 13 фоизига эгалик қилишини тасдиқлади.
