Бангкокда Осиё-Тинч океани иқтисодий ҳамкорлиги саммити вақтида беш давлат вакиллари Россия вазирининг нутқи давомида зални тарк этди
АҚШ, Канада, Янги Зеландия, Япония ва Австралия вакиллари Россия иқтисодий ривожланиш вазири Максим Решетниковнинг чиқиши чоғида Бангкокдаги Осиё-Тинч океани иқтисодий ҳамкорлиги саммитидаги савдо вазирлари йиғилишини тарк этишди. Бу ҳақда Reuters нашри ўз манбаларга таяниб, хабар бермоқда. Таиланд ташқи ишлар вазирлиги бу маълумотни тасдиқлади.
Исмини ошкор этмаган дипломатнинг айтишича, беш давлат вакиллари Россиянинг "Украинадаги ноқонуний босқинчилик уруши ва унинг Осиё-Тинч океани минтақасидаги иқтисодий оқибатларига" норозилик сифатида йиғилишни тарк этган.
Бошқа бир дипломатнинг айтишича, ушбу дипломатлар Осиё-Тинч океани иқтисодий ҳамкорлиги саммитининг 22 майга белгиланган якуний баёнотида бошқа иштирокчилардан "урушга нисбатан кучлироқ позицияни" талаб қилишган.
Таиланд мулозимининг сўзларига кўра, беш давлат делегациялари Решетников нутқини тугатгандан сўнг йиғилишга қайтган.
