АҚШ Қимматли қоғозлар комиссияси Binance’ни судга берди
АҚШ Қимматли қоғозлар ва биржалар комиссияси (SEC) энг йирик криптовалюта биржаси Binance Holdings Ins., унинг АҚШдаги филиали ва компания асосчиси Чанпэн Чжао устидан 13 та айблов билан Вашингтон судига мурожаат қилди.
SEC аризасида айтилишича, биржа АҚШда рўйхатдан ўтмаган ва унга АҚШ фуқароларига хизмат кўрсатишга рухсат берилмаган бўлса-да, у айрим бадавлат америкаликларга платформадан фойдаланишга имкон берган.
“Чжао ва Binance платформа операторларини яширган ҳолда инвесторларга рискларни назорат қилиш тартиб-қоидалари ҳамда савдо ҳажмлари ҳақида чалғитувчи маълумот берган”, — деди SEC раҳбари Гари Генслер.
Binance сайтида айтилишича, компания платформани фаол ҳимоя қилиш ниятида. Binance АҚШ биржаси эмаслиги сабабли SEC ҳаракатлари чекланган, дейилади хабарда. “Binance ва унга ҳамкор платформалардаги фойдаланувчиларнинг барча активлари, шу жумладан Binance.US, хавфсиздир”, — қўшимча қилинган хабарда.
Binance.US вакиллари SEC аризаси “на фактлар, на қонун ва на Комиссиянинг ўз прецеденти билан асосланган”ини айтди.
SEC даъвоси ҳақидаги хабарлар ортидан, дунёдаги энг йирик криптовалюта нархи 5 фоиздан кўпроққа тушиб, ҳар бир танга баҳоси 25 650 долларни ташкил этди, бу сўнгги уч ой ичидаги энг паст қиймат. Binance BNB криптовалютаси 9 фоиздан кўпроққа арзонлашиб, ҳар бир танга баҳоси 276 долларгача тушди.
