Мадуронинг ҳукмронлиги тугади, у энди президент эмас — Доналд Трамп

АҚШ президентининг бошқа баёнотлари:

◾️ АҚШ Венесуэлада хавфсиз, тўғри, оқилона ва қонуний ҳокимият алмашувини таъминлаш имконияти пайдо бўлгунига қадар ушбу мамлакатни бошқаришни режалаштирмоқда;

◾️ Венесуэладаги барча сиёсий арбоблар шуни тушуниши керакки, Мадуронинг бошига тушган ҳолат исталган кишининг бошига тушиши мумкин;

◾️ Ўнлаб йиллар давомида Қўшма Штатларнинг бошқа маъмуриятлари Венесуэла каби минтақавий таҳдидларни эътиборсиз қолдирди, баъзан эса ҳатто унинг кучайишига ёрдам берди;

◾️ Биз Мадурони қоронғуликда қўлга олдик, Каракасда электр чироқлари ўчирилган эди. АҚШ Мадурони Америка судига топширади. Мадуро ва унинг рафиқаси АҚШ адлия тизимининг кучини ҳис қилади;

◾️ Диктатор Мадуро гиёҳванд моддалар контрабандаси учун жавобгар ҳисобланади. У минглаб америкаликларнинг ўлимига сабаб бўлган наркотрафикни шахсан бошқарган;

◾️ Мадуро режими Венесуэладаги қамоқхоналардан энг бешафқат “маҳлуқларни” чиқариб, америкаликларнинг осуда ҳаётини тортиб олиш учун АҚШга юборган;

◾️ Венесуэладаги бутун нефт саноатини америкаликлар барпо этган, бироқ у ердаги социалистлар биздан ҳаммасини тортиб олишди. Венесуэла, шунингдек, АҚШнинг миллиардлаб долларлик активлари, платформалари ва маблағларини тортиб олган;

◾️ Наркокартеллар ниҳоятда бешафқат эди, аммо энди бундай бўлмайди. Қуролли кучларимизнинг бажараётган аъло даражадаги ишини алоҳида қайд этиш лозим;

◾️ Мадуро режими бошқа давлатларнинг ҳарбий маслаҳатчиларидан фойдаланган ва кеча бизга қарши хорижий давлатлар қуролларини ишлатди;

◾️ Биз дунёдаги энг йирик нефт компанияларимизни Венесуэланинг жиддий зарар кўрган нефт инфратузилмасини таъмирлашга миллиардлаб доллар сарфлаш ва Қўшма Штатларга фойда келтиришни бошлашга мажбур қиламиз;

◾️ Биз Венесуэла халқини бой ва озод қиламиз. Биз уларни бахтли қиламиз;

◾️ Венесуэла улкан имкониятларига қарамай, деярли нефт қазиб чиқармаган;

◾️ Агар зарурат бўлса, Венесуэлада иккинчи ҳужум тўлқинини ҳам амалга оширамиз. У янада каттароқ бўлади;

◾️ Бизда дунёдаги энг яхши қуроллар бор. АҚШ денгиз орқали олиб ўтилган наркотрафикнинг 97 фоизини йўқ қилди;

◾️ Мадуро Cartel de los Soles наркокартелини бошқарган.