Yangi Kaledoniya Fransiya xavfsizlik kuchlarining ketishini talab qilmoqda

Orol mustaqilligi tarafdorlari Parij bilan muloqot uchun xalqaro missiya yaratishni taklif qilmoqda.

Kanak sosialistik milliy ozodlik fronti Fransiya xavfsizlik kuchlarini oroldan «zudlik bilan» olib chiqib ketishga chaqirdi.

Tashkilot Parijni Yangi Kaledoniyaning tub aholisini o‘z taqdirini o‘zi belgilash va o‘z yerlarini mustaqil boshqarish huquqidan mahrum qilishga qaratilgan konstitusiyaviy islohotga qarshi chiqqanlarga nisbatan qattiq bosimni davom ettirishda ayblaydi.

Matbuot anjumanida front yetakchilari may oyida boshlangan norozilik namoyishlarini bostirish uchun Fransiya hukumati tomonidan zirhli texnika bilan birga yuborilgan qo‘shimcha polisiya, jandarm va harbiy xizmatchilarni oroldan olib chiqishni talab qildi.

13 maydan beri Yangi Kaledoniyada ommaviy tartibsizliklar oqibatida 10 kishi halok bo‘ldi. Bir necha bino va transport vositalari, jumladan polisiya bo‘limi ham yoqib yuborilgan.

Kanaklar Fransiyaning xorijdagi 300 ming aholisining taxminan 40% ni tashkil qiladi.

Parij o‘zgartirishlar orqali Yangi Kaledoniyada istiqomat qiluvchi 25 mingdan ortiq etnik fransuzlardan iborat qo‘shimcha guruhga ovoz berish imkoniyatini bermoqchi. Bu mahalliy aholining saylovlardagi ta’sirini jiddiy ravishda kamaytiradi.

Orollarda mustaqillik bo‘yicha referendumlar uch marta – 2018, 2020 va 2021 yillarda o‘tkazilgan. 17 000 km uzoqlikda joylashgan Fransiyadan ajralib chiqish tarafdorlari o‘shanda kerakli ovozlarning yarmini to‘play olmadilar.