Women in Tech CCA Awards 2024: innovasiyalar va yutuqlar tanlovi

2024 yil 20 oktyabr kuni Toshkentda Women in Tech CCA Awards mukofoti doirasida taqdirlash marosimi bo‘lib o‘tdi. Tadbirda O‘zbekiston, Qozog‘iston, Gruziya, Qirg‘iziston, Ozarbayjon va boshqa davlatlardan kelgan yetakchi IT sohasi vakillari, startap asoschilari va innovatorlar ishtirok etdi.

Mukofotning maqsadi — texnologiya sohasidagi ayollarning yutuqlarini e’tirof etish va ularni qo‘llab-quvvatlashdan iboratdir. Mukofot nomzodlari yetakchilik, innovasion va ijtimoiy faollik ko‘rsatgan ishtirokchilar orasidan tanlandi.

Shunday qilib, mintaqaviy mukofot sohibalari quyidagilar bo‘ldi:

• Aziza Nematova, O‘zbekiston, Cyber Security Club Uzbekistan — ASPIRING TEEN;
• Nazeli Ter-Petrosyan, Armaniston, Al Researcher, Al Developer — WOMAN IN WEB3;
• Rada Islamova, Qozog‘iston, Wonder Women CEO — BEST ALLY;
• Kamila Daminova, O‘zbekiston, "HEAL" — Health Care direktori — MOST IMPACTFUL INITIATIVE;
• Laman Aliyeva, Ozarbayjon, Artificial Intelligence HUB hammuassisi — MOST DISRUPTIVE;
• Salome Kukava, Gruziya, Globalize asoschisi va bosh direktori — TECH DIPLOMACY;
• Assel Seyfullina, Qozog‘iston, Global Green Hub asoschisi — GREENTECH STARTUP;
• Nigora Dadabayeva, O‘zbekiston, MedTech AI Solutions asoschisi va direktori — LIFETIME ACHIEVEMENT;
• Dinara Kojamjarova, Qozog‘iston, Qabi Tech hammuassisi, bosh texnologiya direktori — GLOBAL LEADERSHIP.

«Mukofot olish men uchun hayajonli va unutilmas voqea bo‘ldi. Bu menga Germaniyada doktorlik dissertasiyam uchun grant yutganimdagi hayajonli tuyg‘ularni qayta eslatdi. Yaqinda qo‘lga kiritilgan mukofot men uchun o‘sha his-tuyg‘ularni yana qaytardi», — deydi LIFETIME ACHIEVEMENT mukofoti sovrindori Nigora Dadabayeva. «Mazkur mukofot orqali olingan e’tirof va qo‘llab-quvvatlash mening mehnatim va intilishlarimga nisbatan nafaqat e’tirof bo‘ldi, balki meni yanada ilhomlantirdi.»

Har bir kategoriya g‘oliblari 14 noyabr kuni Parijda bo‘lib o‘tadigan Women in Tech Global Awards shortlistiga kiritildi.

«Texnologiyalar dunyosi cheksiz va teng imkoniyatlarni yaratadi. O‘zbekiston bilan hamkorlik ushbu sohada innovasiyalarni rivojlantirishga yordam beradi», — deydi Women in Tech Global asoschisi va bosh direktori Ayumi Mur Aoki. «Women in Tech tashkilotining faoliyati O‘zbekistonda texnologiya sohasida gender nomutanosibligini bartaraf etishga qaratilgan. Biz stereotiplarni yengib o‘tgan, innovasiyalar yaratgan va dunyoni yaxshilashga o‘z hissasini qo‘shayotgan ayollarning yutuqlarini e’tirof etishdan faxrlanamiz. Bu ularning shaxsiy g‘alabasi bo‘lib, IT sohasida tenglik va xilma-xillik sari muhim qadamdir.»

Shuningdek, taqdirlash marosimida O‘zbekiston Fintex Assosiasiyasi raisi Nargis Do‘stmatova, IT Park University bosh direktori Bahodir Ayupov va IT Community O‘zbekiston rahbari Shavkat Karimov ham so‘zga chiqdi. Ular o‘z tajribalari va ayollar uchun O‘zbekiston va jahon bozori istiqbollari haqida gapirdi.

«Axborot texnologiyalari bugungi kunda O‘zbekistonda ustuvor yo‘nalishlardan biri hisoblanadi. Ushbu yo‘nalishdagi qarorlar ularning jamiyat hayotining barcha sohalaridagi rolini oshirishga qaratilgan. Ushbu mukofotlar texnologiya sohasida faoliyat yuritayotgan ayollar mehnatini qadrlash va rag‘batlantirishga xizmat qiladi», — deydi raqamli texnologiyalar vaziri maslahatchisi Kamola Sobirova.

Ko‘plab chiqishlar yosh avlodni rag‘batlantirish va qizlarni IT sohasida o‘z maqsadlariga dadil intilishga ilhomlantirishga qaratilgan edi. Ma’ruzachilar o‘ziga ishonish va qiyinchiliklardan qo‘rqmaslik muhimligini ta’kidladilar.

«IT sohasidagi ayollar soni har yili oshib bormoqda va zamonaviy dunyoda har kuni yangi rol modellari paydo bo‘lmoqda. Ayollar loyihalari davlat qo‘llab-quvvatlashiga muhtoj, va O‘zbekiston hukumati ayollarni qo‘llab-quvvatlashda faol ishtirok etayotgani muhimdir. Ularning rag‘batlantirilishi yangi imkoniyatlarni yaratadi va ayollarga texnologiyalar sohasida muvaffaqiyatga erishishga yordam beradi», — deydi Women in Tech O‘zbekiston direktori Anna Ambrozevich.

Women in Tech Global Awards va Regional Awards butun dunyo bo‘ylab yettita yirik mintaqada o‘tkazildi. Joriy yilda CCA Awards uchun mintaqaning barcha davlatlaridan arizalar qabul qilindi. 45 nomzod final bosqichiga yetib keldi va ulardan 9 nafari hakamlar hay’ati tomonidan eng yaxshilari sifatida taqdirlandi.

Kelajakda bu mukofot innovasion yechimlarni yaratib, texnologiyalar rivojiga katta hissa qo‘shayotgan va kelajak avlodlar uchun o‘rnak bo‘layotgan ayollarni e’tirof etish uchun muhim platforma sifatida xizmat qilishda davom etadi. Women in Tech tashkiloti IT sohasida gender tengligini mustahkamlash va ayollarni qo‘llab-quvvatlash yo‘lida faoliyatini davom ettirib, O‘zbekistonning barcha hududlarida ularni yangi yutuqlar va yetakchilik roliga ilhomlantiradi.

Ta’kidlash kerakki, Women in Tech global tashkiloti 2017 yilda ayollarning texnologiya sohasidagi ishtirokini kengaytirish maqsadida tashkil etilgan. Hozirgi kunda tashkilot dunyo bo‘ylab 56 dan ortiq mamlakatlarda 250 mingdan ziyod ishtirokchini o‘z ichiga oladi. Uning bosh qarorgohi Fransiyada joylashgan bo‘lib, BMTning ayollar agentligi UN Women bilan hamkorlik qiladi. Women in Tech Global asoschisi va bosh direktori Ayumi Mur Aoki dunyoning yetakchi 100 ayoli ro‘yxatiga kiritilgan.

Women in Tech tashkiloti O‘zbekistonda o‘z faoliyatini joriy yilning 2 martida boshladi. Faoliyatning asosiy yo‘nalishlari ta’lim va raqamli inklyuzivlikdir. Asosiy vazifalar qizlarni global hamjamiyatga integrasiya qilish, ularning bilim va ko‘nikmalarini oshirish hamda gender tengligi muhim bo‘lgan sohalarda yetakchilik sifatlarini rivojlantirishdan iborat.