Vladimir Putin Ukrainaning bosib olingan hududlari aholisiga ultimatum qo‘ydi

Kreml Ukrainaning bosib olingan hududlarida yashovchi ukrainaliklardan Rossiya fuqaroligini qabul qilishni talab qilmoqda, aks holda ular hududni tark etishga majbur bo‘ladi. Vladimir Putinning bir kun oldin e’lon qilingan farmonida ta’kidlanganidek, o‘z maqomini qonuniylashtirmaganlar 10 sentyabrgacha ketishlari kerak. Gap Xerson, Zaporojye, Lugansk va Donesk viloyatlari aholisi haqida bormoqda.

Rasmiy ravishda odamlarda tanlov bor, lekin aslida mamlakatning Ukraina nazorati ostidagi qismiga ketishga urinish juda katta xavf bilan to‘la - ular front chizig‘ini kesib o‘tishlari kerak. Qrimga Ukraina hujjatlari bilan sayohat qilish esa, OAV xabarlariga ko‘ra, odamlarni orqaga qaytarish bilan yakunlanadi. Rossiya pasportisiz qolganlar deportasiya qilinish, ish joyidan mahrum bo‘lish, sog‘liqni saqlash va ta’lim olish imkoniyatidan mahrum bo‘lish, ayrim hollarda esa mol-mulkini yo‘qotish xavfi bor.

Aksariyat ukrainaliklar bosqinchi hokimiyat tomonidan bosim – tahdid, kaltak va qiynoqlardan shikoyat qiladi. Rossiya fuqaroligini olishdan bosh tortganlar dushman sanaladi. Shu bilan birga, Ukraina majburiy pasportlashtirishni noqonuniy deb ataydi va Rossiya tomonidan berilgan hujjatlarni tan olmaydi.

Ayni paytda, Rossiya Ichki ishlar vazirligi ma’lumotlariga ko‘ra, 3,5 million ukrainalik allaqachon Rossiya pasportini olgan. “Kommersant” gazetasining yozishicha, Vladimir Putin Donald Trampni anneksiya qilingan barcha hududlarni, jumladan Qrimni ham Rossiyaning bir qismi sifatida rasman tan olishga ishontirishga umid qilmoqda.