O‘zbekistonda 10 ta xususiy klinika lisenziyasiz xizmatlar ko‘rsatayotgani ma’lum bo‘ldi

Raqobatni rivojlantirish va iste’molchilar huquqlarini himoya qilish qo‘mitasi O‘zbekistondagi xususiy tibbiyot muassasalari faoliyatida bir qator qonunbuzarliklar, jumladan, lisenziyasiz xizmatlar ko‘rsatish holatlarini aniqladi.

Tekshiruv iste’molchilar huquqlarini himoya qilish sohasida faoliyat yurituvchi nodavlat, notijorat tashkilotlari bilan hamkorlikda o‘tkazilgan.

Qo‘mita ma’lumotlariga ko‘ra, respublikadagi barcha xususiy tibbiyot muassasalarining 85 foizi (8486 tadan 7284 tasi) qamrab olingan o‘rganishlar davomida quyidagi huquqbuzarliklar aniqlangan:

• 27,4 foizi (2000 tasi) amalda ko‘rsatilgan manzilda faoliyat yuritmagan;
• 3 foizida (235 tasi) peshlavhalari mavjud emas;
• 47 foizida (3428 tasi) tashqi reklama ob’ektlari joylashtirilgan;
• 20 foizida (1460 tasi) axborotlar davlat tilida berilmagan;
• 61,5 foizida (4483 tasi) xizmatlarning narxnomalari ko‘rsatilmagan.

Bundan tashqari, ayrim tibbiyot tashkilotlarining lisenziyasida mavjud bo‘lmagan faoliyat bilan ham shug‘ullanayotganlik holatlari aniqlangan. Bularga quyidagilar kiradi:

• Samarqand viloyati — AFX Dardga Shifo;
• Surxondaryo viloyati — Nigora Plus Charos Med, Sherobod Shifo Maskani;
• Toshkent viloyati — Qiziltog Dental, Murod Yorqin Najot, Chirchiq Zinnura Stom, Tursunoy Faxr Stom, Buloqboshi Sog’lomlashtirish Klinikasi;
• Farg‘ona viloyati — Zaylobiddin Shifo Nur, U-Shifo Center;

To‘plangan materiallar chora ko‘rish uchun mutasaddi organlarga taqdim etilgan.