O‘zbekiston Prezidenti va Pokiston Bosh vaziri samarali muzokaralar natijalarini yuqori baholadilar

O‘zbekiston Respublikasi Prezidenti Shavkat Mirziyoyev va Pokiston Bosh vaziri Shahboz Sharif Islomobod shahrida bo‘lib o‘tgan Strategik hamkorlik kengashining birinchi yig‘ilishi yakunlari bo‘yicha ommaviy axborot vositalari vakillari uchun bayonot berdilar.

Mamlakatimiz yetakchisi so‘zining avvalida Pokistonga davlat tashrifi bilan kelish taklifi va o‘tkazilgan samarali muzokaralar uchun ushbu mamlakat hukumati rahbariga minnatdorlik bildirdi.

Jadal rivojlanayotgan Pokiston O‘zbekistonning ishonchli strategik sherigi ekanligi alohida ta’kidlandi. Pokiston Bosh vaziri rahbarligida xalq farovonligini oshirish, iqtisodiy o‘sishni jadallashtirish va mamlakatning xalqaro mavqeini mustahkamlash borasida amalga oshirilayotgan keng ko‘lamli islohotlar O‘zbekistonni xursand qilayotgani aytildi.

Shuningdek, ushbu tashrif O‘zbekiston – Pokiston strategik sheriklik munosabatlari o‘rnatilganining besh yilligida o‘tkazilayotgani mamnuniyat bilan qayd etildi.

So‘nggi besh yilda o‘zaro savdo 2,5 baravarga, qo‘shma korxonalar va loyihalar soni esa qariyb 3 baravarga oshdi. Yaqin kelajakda savdo aylanmasini 2 milliard dollarga yetkazish maqsad qilib qo‘yildi. 3,5 milliard dollarlik istiqbolli savdo va investisiya bitimlarining portfeli shakllantirildi.

Muzokaralar yakunida Qo‘shma deklarasiya va hamkorlikning ustuvor yo‘nalishlari bo‘yicha 30 ga yaqin muhim hujjat imzolandi.

Ertaga Pokistonning yetakchi kompaniyalari vakillari bilan uchrashuv bo‘lib o‘tadi.

Mintaqaviy hamkorlikni izchil rivojlantirish orqali Markaziy va Janubiy Osiyoning o‘zaro bog‘liqligini birgalikda mustahkamlashga intilish qat’iy ekani bildirildi. Xalqaro va mintaqaviy tashkilotlar doirasida o‘zaro qo‘llab-quvvatlashni davom ettirishga tayyorlik qayd etildi.

O‘zbekiston Prezidenti Pokistonning mamlakatimizning Jahon savdo tashkilotiga a’zo bo‘lishini faol qo‘llab-quvvatlagani uchun minnatdorlik bildirdi. Pokistonning 2025-2026 yillarda BMT Xavfsizlik Kengashining muvaqqat a’zosi sifatida tinchlik va xalqaro barqarorlikni ta’minlash borasidagi sa’y-harakatlariga yuqori baho berildi.

Farmasevtika, to‘qimachilik, elektrotexnika, tog‘-kon va oziq-ovqat sanoati, qishloq xo‘jaligi sohalarida hamkorlikni kengaytirish bo‘yicha kelishuvga erishildi. Transport va logistika aloqalarini rivojlantirish hamda biznes uchun qulay sharoitlar yaratishga alohida e’tibor qaratildi.

Hududlararo hamkorlikni chuqurlashtirish maqsadida bu yil O‘zbekistonda birinchi Hududlararo forumni o‘tkazishga qaror qilindi.

Bundan tashqari, birgalikda madaniyat haftaliklari va kinofestivallarni tashkil etish hamda buyuk mutafakkirlarning ilmiy-ma’rifiy merosini o‘rganish va ommalashtirish rejalashtirilmoqda.

Islomobod ko‘chalaridan biriga Toshkent nomi berilgani uchun yana bir bor minnatdorlik bildirildi.

Prezidentimiz, o‘z navbatida, Pokiston poytaxtida buyuk davlat arbobi va shoir Zahiriddin Muhammad Bobur nomidagi bog‘ni bunyod etish to‘g‘risida qaror qabul qilinganini e’lon qildi. Bu Pokiston xalqiga mamlakat mustaqilligi bayrami nishonlanishi arafasida munosib tuhfa bo‘ladi.

Mamlakatimiz yetakchisi Pokiston Milliy fan va texnologiyalar universitetining faxriy doktori va professori ilmiy unvonlari berilgani uchun Pokistonga alohida minnatdorlik bildirdi.

Shavkat Mirziyoyev nutqining yakunida barchani bo‘lajak Pokiston kuni bayrami va yaqinlashib kelayotgan muborak Ramazon oyi bilan tabrikladi.