Tugatilayotgan kollejlar binosidan qanday maqsadlarda foydalaniladi?

Jizzax viloyatidagi Arnasoy kompyuter texnologiyalari va xizmat ko‘rsatish kasb-hunar kolleji faoliyati tugatiladimi? Tuman markazidan 25 kilometr olisda – Do‘stlik qishlog‘ida joylashgan ushbu zamonaviy inshootdan qanday maqsadda foydalansa bo‘ladi?

Inshootdan maktab, maktabgacha ta’lim muassasasi sifatida foydalanishga qishloqda ehtiyoj yo‘q, ustiga ustak buning uchun masofa ham birmuncha uzoqlik qiladi. Ammo bu inshoot bo‘sh qoladi, degani emas. Hozircha hududdagi 7-, 16- va 17-umumta’lim maktablari uchun o‘quv ishlab chiqarish markaziga aylantirish taklif qilinayotir.

Bundan tashqari, yangi ish o‘rinlari yaratish maqsadida kollej binosini tuman hokimligi balansiga o‘tkazib, ishlab chiqarishni yo‘lga qo‘yish uchun investisiya kiritish sharti bilan biror tadbirkorga tekinga berish ham mumkin.

Viloyatda Prezidentimizning 2018 yil 25 yanvardagi «Umumiy o‘rta, o‘rta maxsus va kasb-hunar ta’limi tizimini tubdan takomillashtirish chora-tadbirlari to‘g‘risida»gi farmoni ijrosini ta’minlash bo‘yicha O‘zbekiston Vazirlar Mahkamasining joriy yil 29 martdagi yig‘ilishi bayoni asosida tuzilgan ishchi guruh tomonidan hududdagi kasb-hunar kollejlarini optimallashtirish masalasi to‘liq va har tomonlama o‘rganib chiqildi.

O‘rganish natijalari tahlil qilinib, 9-sinf bitiruvchilarini 11 yillik ta’lim bilan qamrab olish, kasb-hunar kollejlarida kadrlarni maqsadli tayyorlash va kelgusida ularni ish bilan ta’minlash masalasi hisob-kitob qilindi. Sohalar va kasblar kesimida hamda mehnat bozoridagi talab va taklif tahlil qilinib, kasb-hunar kollejlarini optimallashtirish bo‘yicha Respublika ishchi guruhiga takliflar taqdim etildi.

– Ishchi guruh xulosalari asosida viloyatdagi 78 kasb-hunar kollejidan 33 tasining faoliyati davom ettirilishi taklif qilinayotir, – deydi viloyat o‘rta maxsus kasb-hunar ta’limi boshqarmasi boshlig‘i Bobur O‘sarov. – Jumladan, faoliyati davom ettiriladigan kasb-hunar kollejining 17 tasini vazirlik va idoralar tasarrufiga o‘tkazish, 16 tasi ko‘p tarmoqli ta’lim muassasasi sifatida faoliyat yuritishi bo‘yicha takliflar tayyorlandi. Ularni tayyorlashda hududda ishlab chiqarish kuchlarining joylashuvi, iqtisodiyotning bugungi va kelajakda rivojlanish istiqbollari hisobga olindi. Xususan, viloyatda barpo etilayotgan «Uzbekistan Peugeot Citroen Automotive» zavodini kadrlar bilan ta’minlash maqsadida Jizzax transport aloqa kasb-hunar kolleji «O‘zavtosanoat» aksiyadorlik jamiyati tasarrufiga, Jizzax neftni qayta ishlash korxonasi qurilayotgani hisobga olinib SH.Rashidov maishiy xizmat ko‘rsatish va iqtisodiyot kollejini «O‘zbekneftgaz» aksiyadorlik jamiyati tasarrufiga o‘tkazish takliflari ishlab chiqildi.

Kollejlarning bir qator vazirlik, idora, xo‘jalik birlashmalari, banklar va yirik korxonalar – kadrlar buyurtmachilari tasarrufiga o‘tkazilishi yangi, eng zarur va yoshlar uchun qiziqarli bo‘lgan kasb egalarini tayyorlash imkonini beradi. Bir qator vazirlik, idora va boshqa ish beruvchilar endi kadrlarni tayyorlash bilan ham o‘zlari shug‘ullanishi mo‘ljallanmoqda.

Kollejlarning bir qismini ko‘p tarmoqli ta’lim muassasasi sifatida saqlab qolish bo‘yicha xulosa tayyorlashda ham hududdagi kadrlarga bo‘lgan talab va taklifdan kelib chiqildi. Bunda ham kadrlar tayyorlashning eng maqbul yo‘nalish va shakllariga e’tibor qaratilmoqda. 

Faoliyati yakunlanishi mo‘ljallanayotgan 37 ta’lim muassasasining bino va inshootlaridan, mol-mulkidan samarali foydalanishni tashkil etish maqsadida ularga umumiy o‘rta ta’lim maktablari va o‘quv ishlab chiqarish majmualarini joylashtirish bo‘yicha ham aniq takliflar tayyorlandi. 

Aholi gavjum hududlarda joylashgan kasb-hunar kollejlarining bo‘shayotgan binolariga ehtiyoj katta. «Qo‘ynidan to‘kilsa, qo‘njiga» deganlaridek, zamonaviy loyiha asosida ta’lim muassasasiga mo‘ljallab qurilgan bu binolar 11 yillik ta’limga o‘tilishi munosabati bilan o‘quvchilar soni ortayotgan maktablarga juda asqotadi. Ayniqsa, ikki-uch navbatda o‘qitilayotgan maktablarga katta qulaylik bo‘ladi. Masalan, G‘allaorol shahri Olimlar mahallasidagi 16-umumta’lim maktabining 320 o‘ringa mo‘ljallangan binosida 740 o‘quvchi ta’lim olmoqda. Hududdagi faoliyatini yakunlash taklif etilayotgan iqtisodiyot kolleji bino va inshootlarining ushbu maktabga berilishi mavjud muammoni hal etishning maqbul yo‘li ekani ko‘rinib turibdi.

Shuning uchun ishchi guruh tomonidan o‘rganish va takliflar tayyorlash jarayonida aynan ta’lim muassasalarining ehtiyoji, hududning iqtisodiy-ijtimoiy rivojlanish istiqbollari, demografik jarayon, bola sonining o‘sishi kabi omillar aniq hisobga olindi. Shunga ko‘ra, faoliyati yakunlanishi mo‘ljallanayotgan kollejlar inshootlarining asosiy qismi – 33 tasini umumiy o‘rta ta’lim maktablariga berish bo‘yicha takliflar ishlab chiqildi.

Takliflarni tayyorlashda aholi manzillaridan chetda joylashgan, o‘quvchilar kelib ketishi qiyin bo‘lgan kasb-hunar kollejlari binolaridan kelajakda maktab yoki maktabgacha ta’lim muassasasi sifatida foydalanish maqsadga muvofiq emasligi hisobga olinmoqda.

Ayni paytda mavjud omillar e’tiborga olinmasdan qoq dala o‘rtasida barpo etilgan kasb-hunar kollejlari ham uchraydi. Bunday kollejlar faoliyatini o‘zgartirish, o‘quv ishlab chiqarish majmualari tashkil etish yuzasidan takliflar tayyorlandi. Yuqorida zikr etilgan Arnasoy axborot texnologiyalari va xizmat ko‘rsatish kolleji umumta’lim maktablarining o‘quv ishlab chiqarish majmuasiga aylantirilayotgan to‘rtta kollejdan biridir.

Xuddi shunday Baxmal axborot texnologiyalari, Zomin meliorasiya va suv xo‘jaligi kasb-hunar kollejlari inshootlarini ham o‘quv ishlab chiqarish majmualariga aylantirish mo‘ljallanayotir. Forish qishloq xo‘jaligi kasb-hunar kollejida maktablar uchun o‘quv ishlab chiqarish majmuasi tashkil etishdan tashqari inshootning bir qismiga Davlat xizmatlari agentligi hamda Yoshlar ittifoqining hududiy kengashlarini joylashtirish taklif etildi.

Biroq, o‘quv ishlab chiqarish majmualari tashkil etish bilan ushbu inshootlar quvvatidan to‘liq foydalanib bo‘lmaydi. Shuning uchun kollej binosini tuman xokimliklari balansiga o‘tkazib, tadbirkorlarga investisiya kiritish va yangi ish o‘rinlari yaratish sharti bilan «0» qiymatda sotish taklifi ham maqbul yechimlardan biridir.

Manba: uza.uz