Toshkentda o‘z onasini o‘ldirib, yerto‘laga ko‘mib qo‘ygan o‘g‘ilga jazo tayinlandi

Ona o‘zining bir parchasini vujudida to‘qqiz oy ko‘tarib yurar ekan, kelajakka bo‘lgan bir olam orzular bilan farzandini dunyoga keltiradi. O‘zi erisholmagan marralarga farzandi yetishishi uchun borini beradi. Kun kelib, o‘z dilbandi qo‘lidan o‘lim topishi esa yetti uxlab tushiga ham kirmasa kerak…

Yana bir bahorga yetganiga shukr qilib uyquga yotgan ona yangi tongni ko‘rolmasligini bilmasdi. Yarim tun! Shu kecha yashirilgan «sir» esa kishini larzaga solmay qo‘ymaydi. Ayni shu tunda o‘g‘il o‘z onasini o‘ldirishga qasd qilgandi. Bir muddat avval esa o‘g‘il onasini begona erkakdan rashk qilishi oqibatida o‘zaro kelishmovchilik yuzaga kelgan. Natijada o‘tmas jism bilan onasining bosh qismiga bir necha marta urib, qo‘lida bo‘lgan oshxona pichog‘i bilan uning o‘ng tomon bo‘yin orqa yuzasini sanchib-kesib, qasddan o‘ldirgan.

Sud majlisida jabrlanuvchining qonuniy vakili tariqasida so‘roq qilingan mahalla raisining bayon qilishicha, ko‘p qavatli uydagi xonadonda marhuma va o‘g‘li istiqomat qilishgan. — Sudlanuvchi aqli zaifligi sababli, o‘zini noodatiy ravishda tutib kelgan. Shu bois mahallada yoki uyda turli nomaqbul ishlarni qilib qo‘ymasligi uchun bir necha marta o‘g‘lini ruhiy davolash muassasasiga joylashtirish to‘g‘risida aytganimda, «o‘g‘lim yakka, uni jamiyatdan ajratmaslikka harakat qilaman», degandi. Biroq bu oila notinch yoki muammoli oilalar turkumiga kirmagan. Oila o‘ziga to‘q yashagan. Bir necha marta sudlanuvchini ishga joylashtirilgan. Biroq sudlanuvchi kelajagi uchun poydevor qilishga harakat qilmay, ishlamasligini ma’lum qilgan. Onasi esa uni o‘zi boqishini aytgan. Bir necha oy avval marhuma va o‘g‘li o‘zaro janjallashib qolishgandi. Ular pod’ezdda janjallashishayotganda mahalla faollari va mahalla noziri ularga tushuntirish berishimizga qaramasdan, hattoki mahalla nozirining talablariga bo‘ysunishmagan. Janjal sababi esa sudlanuvchi onasining hayotiga aralashib, erkak kishi bilan uchrashgani uchun uni qizg‘angan va urishgan. Ular ma’muriy huquqbuzarlik sodir qilganligi bois javobgar ham qilingan. Biroq sudlanuvchi yurish-turishini to‘g‘rilamagan. Mahalla faollari va nozir bilan maslahatlashib, o‘sha vaqtda ruhiy davolash maqsadida psixiatrik naryad chaqirilib, davolashga jo‘natilgan. Oradan 40 kun o‘tgach, sudlanuvchi davolanishdan chiqqan, lekin nomaqbul harakatlari yo‘qolmagan. Voqea sodir bo‘lgan kuni bir fuqaro sudlanuvchining tungi soat 02:30 larda uyning yerto‘lasida fonar bilan yurganini ko‘rgan ekan, - dedi qonuniy vakil.

Gap shundaki, o‘g‘il sodir etgan jinoyatini yashirish maqsadida onasining jasadini o‘zi yashab kelayotgan xonadonning yerto‘lasiga ko‘mib qo‘ygan. U jinoyati fosh bo‘lishidan qo‘rqib, profilaktika inspektoriga onasini qidirib topishda yordam so‘rab murojaat qiladi. Uning murojaatiga asosan tezkor qidiruv xodimlari tomonidan ayolning yashash xonadoni yerto‘lasi ko‘zdan kechirilganda jasad qotillik alomatlari bilan topilgan.

Sud tibbiyot ekspertizasining xulosasiga ko‘ra, ayolning o‘limi bosh miya yopiq jarohati fonida, bo‘yin qon tomirlari va yumshoq to‘qimalarining shikastlanishiga olib kelgan va bo‘yin orqa yuzasi o‘ng tomonlama kesilgan yarasi oqibatida kelib chiqqan tashqi qon yo‘qotishdan yuz berganligi aniqlangan.

Sud psixotrik ekspertizasining xulosasiga ko‘ra esa sudlanuvchi ruhiy sog‘lom deb topilgan.

«BIR AMALLAB YERTO‘LAGA SUDRAB OLIB TUSHDIM»

Sudda sudlanuvchi o‘g‘il aybiga to‘liq iqrorlik bildirdi. — O‘sha tunda onam uxlashimni, ertasi kuni ertalabdan bozorga tushishimizni aytdi. Yarim tunda uyg‘onib ketdim, soat 02:00 edi. Onam menga idishda suv olib keldi va «ichib ol», dedi. Kosadagi suvni ichib, uxlab qoldim. 20 daqiqa o‘tgach yana uyg‘ondim. O‘sha vaqt onam meni urayotganini angladim. Bu holat uyning mehmonxonasida sodir bo‘ldi. Onam balkondan temirdan yasalgan idishni olib kelib, tizza va oyoqlarimga urdi va oshxona pichog‘ini ko‘tarib keldi, menga tiqmoqchi bo‘ldi. Pichoq ushlagan qo‘lidan ushlab, oshxonaga qamab qo‘ydim. U yerdan chiqib, pichoq bilan tashlanmoqchi bo‘ldi. O‘sha vaqt qo‘lidan ushlab oldim va onamni o‘ldirish maqsadida pichoqni uning bo‘yin qismiga tiqdim. Shu payt onam yiqilib, peshonasi bilan devorga urildi. Yerga yiqildi, boshi pastga qaragan holda yotardi. Uning boshini orqa qismidan ushlab turdim, bo‘yin qismidan qon keta boshladi. Onam qo‘limdan chiqmoqchi bo‘ldi, men esa boshini yerga qaratib bir necha marta urdim va joni uzilganini sezdim. Bu voqea oshxonada sodir bo‘ldi. Jasadni uydan yo‘qotish maqsadida ko‘tarishga harakat qildim. Vazni og‘irligi sababli ko‘tarishga qiynaldim. Ko‘tarishga qulay bo‘lishi uchun qo‘l-oyoqlarini yerto‘ladan olib chiqqan eski latta bo‘lagi bilan bog‘ladim va sudrashga qaror qildim. Uydan tashqariga chiqib yon atrofni ko‘zdan kechirdim. Hech kim yo‘qligiga amin bo‘lgach, yerto‘laga murdani ko‘mish maqsadida chuqur qazib tayyorladim. Qo‘llaridan tortib, pod’ezdga olib chiqdim, murdani bir amallab yerto‘laga sudrab olib tushdim. Tayyorlab qo‘yilgan yerto‘la ichidagi chuqurga ko‘mib tashladim. Hech kim bilmasligi uchun ustini yopib qo‘ydim. Oshxonadagi qon izlarini yo‘qotish maqsadida ko‘rpacha, palas, xontaxta va stuldagi qon dog‘larini nam latta bilan tozaladim. Latta va ustimdagi kiyimlarni yechib, ularni yuvdim. Qon dog‘lari bo‘lgan paketlarni ham musor idishga tashlab yubordim. Oradan 2-3 kun vaqt o‘tgandan so‘ng Ichki ishlar organi xodimlariga borib, «onam yo‘qolib qoldi», dedim, ammo o‘ldirganimni gapirmadim. Ular tomonidan yashash xonadonimning yerto‘lasi ko‘zdan kechirilganda, onamning jasadi qotillik alomatlari bilan topildi va aybimni tan oldim, - deydi qilmishidan pushaymonligini bayon qilgan sudlanuvchi.

Abdulla Abdulxayev, jinoyat ishlari bo‘yicha Shayxontohur tuman sudi sudyasi:

— Sudlanuvchi Jinoyat kodeksining 97-moddasi (qasddan odam o‘ldirish) 1-qismi bilan aybdor deb topildi va 10 yil muddatga ozodlikdan mahrum qilindi.

Sadoqat ALLABERGANOVA,

Toshkent shahar sudi matbuot kotibi