Toshkentda taniqli bloger o‘z uyida Nil timsohini noqonuniy saqlab kelayotganligi ma’lum bo‘ldi (VIDEO)

Ijtimoiy tarmoqlarda fuqarolardan biri Nil timsohini uyida saqlayotganligi aks etgan video tarqaldi.

Holat yuzasidan Ekologiya, atrof-muhitni muhofaza qilish va iqlim o‘zgarishi vazirligi davlat nazorat inspeksiyasi xodimlari tomonidan tezkor o‘rganish ishlari olib borildi. Reyd davomida Toshkent shahrida yashovchi fuqaro yashash manzilida 1 dona Nil timsohini saqlayotganligi aniqlandi.

Ma’lumot uchun, Vazirlar Mahkamasining "Yovvoyi hayvonlarni saqlash tartibini takomillashtirish chora-tadbirlari to‘g‘risida"gi 736-son qaroriga asosan, 2025 yil 1 yanvardan jismoniy shaxslar tomonidan (ro‘yxat asosida) yovvoyi hayvonlarni tutqunlikda saqlash hamda sirk tomoshalarida yovvoyi hayvonlardan foydalanish taqiqlandi.

Timsoh Toshkent hayvonot bog’iga topshirildi. Huquqbuzarga Ma’muriy javobgarlik to‘g‘risidagi Kodeksning 92prim 1-moddasi 1-qismi bilan ma’muriy bayonnoma rasmiylashtirildi. Ish yuzasidan to‘plangan hujjatlar holatga huquqiy baho berish va tegishli chora ko‘rish maqsadida sud organlariga yuborildi.

Ushbu yo‘nalishdagi ekologik nazorat tadbirlari barcha hududlarda davom ettirilmoqda.