Tanzila Norboyeva boshchiligidagi delegasiya Ozarbayjonda bo‘lib turibdi
O‘zbekiston Respublikasi Oliy Majlisi Senati raisi Tanzila Norboyeva boshchiligidagi O‘zbekiston delegasiyasi Ozarbayjonga tashrif buyurdi.
Ozarbayjon Prezidenti Ilhom Aliyev Senat raisi Tanzila Norboyevani qabul qildi.
O‘zaro muloqotda davlatlararo rivojlanib borayotgan hamkorlik aloqalari e’tirof etildi.
Tashrif davomida Senat raisi Tanzila Norboyeva Ozarbayjon Respublikasiga rasmiy tashrifi doirasida Ozarbayjon Respublikasi Milliy Mejlisi raisi Sahiba Gafarova bilan uchrashdi.
Uchrashuvda ikki davlat rahbarlari o‘rtasidagi ishonchli munosabatlar O‘zbekiston va Ozarbayjon xalqlari o‘rtasidagi do‘stlik va hamkorlik munosabatlarini mustahkamlashning asosi va poydevori ekanligi, shuningdek, parlamentlararo hamkorlikning yangi istiqbollarini ochib berishi ta’kidlandi.
Uchrashuv yakunida o‘zaro manfaatli barcha masalalar yuzasidan parlamentlararo aloqalarni yanada rivojlantirish va mustahkamlashga qaratilgan amaliy chora-tadbirlarni ro‘yobga chiqarish bo‘yicha kelishuvga erishildi.
Tashrif doirasida O‘zbekiston va Ozarbayjon tadbirkor ayollari o‘rtasida “B2B” formatida o‘tkazilgan uchrashuvlar natijasida 54 million dollardan ortiq miqdorda 19 shartnoma va memorandumlar imzolandi.
