Surxondaryoda ko‘p miqdordagi giyohvandlik moddasini sotayotganlar ushlandi

Surxondaryo viloyat IIB Transportda XTBning xabar berishicha, 2020 yil 29 yanvar kuni “XXX” ismli shaxs Surxondaryo viloyat IIB Transportda XTB boshlig‘i nomiga ariza bilan murojaat qilgan. Fuqaro o‘z arizasida Boysun tumani Machay qishlog‘ida yashovchi, yoshi taxminan 40-45 lar atroflarida bo‘lgan “Shavkat” ismli shaxs giyohvandlik vositalarini qonunga xilof ravishda sotish bilan shug‘ullanib yurganini va unga nisbatan qonuniy chora ko‘rishni so‘ragan.

Shundan so‘ng Surxondaryo viloyat IIB Transportda XTB xodimlari tomonidan tezkor tadbir o‘tkazilib, 2020 yil 29 yanvar kuni soat 18:00 da Darband temir yo‘l bekati hududida “Darband-Sho‘rob” temir yo‘l bekatlari oralig‘i 142 km. 9-piketiga yaqin joyida joylashgan “Darband” to‘yxonasi va temir yo‘l izi orasidan o‘tgan soy bo‘yida giyohvandlik vositasini “Nazorat ostida sotib olish” jarayonida Boysun tumani “O‘rta Machay” mahallasida yashovchi E. SH. tadbirga mijoz sifatida jalb qilingan “XXX” ismli shaxslarga 4 000 000 (to‘rt million) so‘m evaziga 14 dona “SPICHKI” yozuvli gugurt qutisiga joylashtirilgan och yashil rangli, o‘ziga xos o‘tkir hidli, o‘simliksimon “Marixuana” giyohvandlik moddasiga o‘xshash moddani sotayotgani aniqlanib, tadbir ishtirokchilari tomonidan ushlangan va ushbu daliliy ashyolar xolislar ishtirokida bayonnoma rasmiylashtirilib olingan.

Shuningdek, moddani sotgan shaxs N. T. ekanligi aniqlangan va nazorat tariqasida berilgan pullar ham hujjatlashtirilib olingan. Tergov jarayonida N. ushbu giyohvandlik moddalarini o‘z uyida ekib yetishtirgani ham aniqlandi.

Surxondaryo viloyat IIB EKB sud kimyoviy ekspertizasining 2020 yil 30 yanvar kunidagi 18-sonli xulosasiga ko‘ra, fuqaro E. SH.dan olingan och yashil rangli, o‘ziga xos o‘tkir hidli, quruq holdagi o‘simliksimon “Marixuana” giyohvandlik moddasiga o‘xshash moddaning tarkibida tedragidrokannabinol mavjud bo‘lgan «Marixuana» giyohvandlik moddasi bo‘lib, uning sof vazni 42.98 gramm ekanligi aniqlangan.

Ayni damda mazkur holat yuzasidan fuqarolar E. SH. va N. T.ga nisbatan O‘zbekiston Respublikasi JKning tegishli moddalari bilan jinoyat ishi qo‘zg‘atildi.