SSV: Vazirlik kaltaklangan shifokorlar ishi doirasida tergov organi bilan yaqindan hamkorlik qilmoqda

Toshkentdagi 1-son shahar klinik shifoxonasida ikki nafar tibbiyot xodimi bemor hamda uning o‘rtoqlari tomonidan ayovsiz kaltaklangani, mazkur hodisa oqibatida jiddiy tan jarohati olgan shifokorlar Respublika shoshilinch tibbiy yordam ilmiy markazida tegishli muolajalarni olayotgani haqida xabar bergan edik.

Tibbiyot xodimlariga jiddiy tan jarohati yetkazgan ushbu shaxslarga nisbatan Jinoyat kodeksining 277-moddasi (Bezorilik) bilan jinoyat ishi qo‘zg‘atilgan.

Jinoyat ishi doirasida 3 nafar ayblanuvchi shaxsga nisbatan qamoqqa olish ehtiyot chorasi qo‘llanilib, ayni paytda tergov harakatlari davom etmoqda.

Bu borada Sog‘liqni saqlash vazirligi tergov organi bilan yaqin hamkorlikda ish olib bormoqda.