Shavkat Mirziyoyev: Tadbirkor ham daromad topsin, odamlar ham

Shavkat Mirziyoyev: Tadbirkor ham daromad topsin, odamlar ham

Prezident Shavkat Mirziyoyev 7 oktyabr kuni Sirdaryo viloyatiga kelib, “Sirdaryo mega lyuks” qo‘shma korxonasi faoliyati bilan tanishdi.

O‘tgan yili bu yerda polipropilendan katta sig‘imli qoplar ishlab chiqarish yo‘lga qo‘yilgan edi. “Yumshoq konteyner” deb ataluvchi bu qoplar 500 kilogrammdan 5000 kilogrammgacha yuk ko‘taradi. Ularga ishlab chiqarish, savdo, qishloq xo‘jaligi, logistika kabi ko‘plab sohalarda talab yuqori. “Sirdaryo mega lyuks” yiliga 132 million dona shunday mahsulot tayyorlash quvvatiga ega.

Ettita korpusdan iborat ulkan korxona izchil rivojlanib bormoqda. Joriy yil may oyida ikki qavatli plyonka tayyorlash yo‘lga qo‘yildi. Yaqin oylarda strech plyonka va spanbond texnologiyasi asosida noto‘qima mato ishlab chiqarish boshlanadi.

Hozirda korxonada 2 mingdan ortiq kishi ish bilan ta’minlangan. Mazkur loyihalar to‘liq quvvatga chiqqach, ish o‘rinlari 5 mingga yetadi.

Bugungi kunda Rossiya, Isroil, Belarus, Ukraina, Qozog‘iston kabi 14 ta mamlakatga eksport yo‘lga qo‘yilgan. Yangi loyihalar bilan birgalikda eksport hajmi 215 million dollarga yetishi mo‘ljallangan.

Davlatimiz rahbariga istiqboldagi loyihalar haqida ham ma’lumot berildi.

Unga ko‘ra, kelgusi besh yilda polimer mahsulotlari ishlab chiqarish bo‘yicha texnopark tashkil etib, umumiy qiymati 350 million dollar bo‘lgan sakkizta loyihani amalga oshirish rejalashtirilgan. Buning uchun 260 million dollar investisiya jalb etilib, Germaniya, Italiya, Avstriya texnologiyasi o‘rnatiladi.

Prezidentimiz loyihalarning iqtisodiy samaradorligi bilan birga ijtimoiy jihatiga ham alohida e’tibor qaratish zarurligini ta’kidladi.

- Bu mahsulotlarning xomashyosi o‘zimizda, ona zaminimizda. Bundan aql bilan foydalanib, narx va sifat mutanosibligi ta’minlansa, mahsulotlarimiz raqobatbardosh bo‘ladi. Faqat iqtisodiy emas, iqtisodiy-ijtimoiy loyihalar qilish kerak. Tadbirkor ham daromad topsin, odamlar ham, - dedi Shavkat Mirziyoyev.

Zarur mablag‘ yo‘naltirib, ishlab chiqarish hajmini ikki barobar oshirish, kelgusida ishchilar uchun uy-joylar barpo etish bo‘yicha ko‘rsatmalar berildi.


Matnda xatolik topsangiz, o‘sha xatoni belgilab, bizga jo‘nating (Ctrl + Enter)

Bo'limga tegishli qiziqarli xabarlar

Fikr bildirish uchun qaydnomadan o'tishingiz so'raladi va telefon rakamni tasdiklash kerak buladi!

Bildirilgan fikrlar (4 )

    Marat Gardeev
    Ўзбекистон тадбиркорлардан олинувчи даромад солиғи паст бўлган давлатлардан бири. Мана нечи йил ўтди фоиз ошмаяпти. Бу Президент томонидан тадбиркорларга қаратилаётган эътибор юқорилигидан. Жамиятда тадбиркорлик қанча ривожланса, халқ шунча бой бўлади
    nozim sedoy
    Президентимизнинг, "Тадбиркор бой бўлса, халқ ҳам, давлат ҳам бой бўлади" деган шиори остида қилаётган ислоҳотлари тахсинга лойиқ.
    nozim sedoy
    Яратилган шарт-шароитлар ва берилаётган имтиёзлар натижасида тадбиркорларимиз илгари тасаввур қилиб бўлмайдиган ютуқларга эришаётгани гувоҳи бўлиябмиз.
    Mc Laren
    Qolgan 4 nomzod saylovoldi targ'ibotidan Sh.Mirziyoyevning targ'ibotlari odamga umid baxsh etyapti. Bu meni shaxsiy fikrim