Saudiya Arabistonidagi AQSH-Rossiya muzokaralari haqida nimalarni bilamiz?

Saudiya Arabistonida seshanba kuni AQSh va Rossiya delegasiyalari o‘rtasida muzokaralar o‘tkazilishi rejalashtirilgan. Bu Rossiya 2022 yil fevralda Ukrainaga keng ko‘lamli bosqinni boshlaganidan beri ikki davlatning yuqori martabali amaldorlari o‘rtasidagi ilk uchrashuv bo‘ladi.

Ukraina urushini tugatish yo‘llarini muhokama qilishdan tashqari, Kreml matbuot kotibi Dmitriy Peskov jurnalistlarga muzokaralar "asosan Rossiya-Amerika munosabatlarining butun majmuasini tiklashga qaratilganligini" ma’lum qildi.

AQSh Davlat departamenti matbuot kotibi Temmi Bryus dushanba kuni aytishicha, ushbu muzokaralar AQSh prezidenti Donald Tramp va Rossiya prezidenti Vladimir Putin o‘rtasidagi telefon suhbatidan keyin Rossiyaning tinchlik muzokaralariga qanchalik jiddiy munosabatda ekanligini ko‘rish uchun qo‘yilgan qadam bo‘ldi.

"Bu Putin va Tramp o‘rtasidagi dastlabki suhbatning davomi bo‘lib, birinchi qadam imkoni bor-yo‘qligini, manfaatlar nimalardan iborat ekanligini va buni boshqarish mumkinmi-yo‘qligini aniqlash uchun xizmat qiladi," - dedi Bryus.

U qo‘shimcha qildiki, seshanba kuni Ukraina delegasiyasi ishtirok etmasa-da, haqiqiy tinchlik muzokaralari faqat Ukraina ishtirokida o‘tkaziladi.

AQSh delegasiyasi tarkibiga davlat kotibi Marko Rubio, Oq uyning milliy xavfsizlik bo‘yicha maslahatchisi Mayk Volts va Yaqin Sharq bo‘yicha maxsus vakil Stiv Vitkoff kiradi.

Ukraina muzokaralarga taklif etilmaganidan norozilik bildirdi, chunki Trampning Putinga bir tomonlama murojaat qilishi Yevropa ittifoqchilarida, uch yilga yaqin urushdan so‘ng Ukraina mudofaasini qo‘llab-quvvatlab kelgan holda, tinchlik muzokaralaridan chetda qolish xavotirini uyg‘otdi.

Bunga javoban Fransiya Ukraina va Yevropa xavfsizligi bo‘yicha favqulodda sammit tashkil etdi.

Zelenskiy Ukraina ommaviy axborot vositalariga aytishicha, Kiyev Ar-Riyoddagi muzokaralar haqida "hech narsa bilmagan". U yana qo‘shimcha qildiki, Ukraina "biz haqimizdagi hech qanday narsani yoki kelishuvni bizsiz tan olmaydi".

Germaniya Tashqi ishlar vazirligi dushanba kuni AQSh va Rossiya o‘rtasidagi to‘g‘ridan-to‘g‘ri aloqa "barqaror va uzoq muddatli tinchlikka erishish yo‘lini topish haqida" bo‘lsa, "yomon narsamas" deya ma’lum qildi.