Saida Mirziyoyeva: "Prezident kutishni, sabr qilishni va shu bilan birga juda yuqori marrani qo‘yishni biladi"

Islohotlarga qattiqqo‘llik bilan erishib bo‘lmaydi. Buning uchun moslashuvchanlik va donolik zarur. O‘zbekiston Prezidenti administrasiyasi rahbari Saida Mirziyoyeva Kirill Altmanning Alter Ego loyihasiga bergan intervyusida prezident Shavkat Mirziyoyevning ish uslubi haqidagi savolga shunday javob berdi.

«Qarang, to‘qqiz yil ichida u qanday islohotlarni amalga oshirdi. Bunga qattiqqo‘llik bilan erishib bo‘lmaydi. Moslashuvchanlik va donolik kerak», — dedi u otasi haqida.

Saida Mirziyoyevaning qo‘shimcha qilishicha, prezident kutishni, sabr qilishni va shu bilan birga juda yuqori marrani qo‘yishni biladi, chunki tuman hokimligidan tortib bosh vazirlikkacha bo‘lgan yo‘lni bosib o‘tib, boshqaruv tizimini chuqur biladi.

Oila va tarbiya haqida

Prezident ko‘p yillar davomida ish va oilani qanday uyg‘unlashtirgani haqidagi savolga javob berar ekan, Saida Mirziyoyeva farzandlar doimo uning yonida bo‘lganini ta’kidladi.

«Bo‘sh vaqti bo‘ldimi — yo o‘zi kelardi, yoki bizni o‘zi bilan olib ketardi. Sayyor tadbirlarda ham biz doim yonida bo‘lardik. Kichkina qizchalar — bu bo‘yicha ko‘p videolar bor. Mirzo Ulug‘bek tumanida biz — ikki qizaloq — u kishining yonidamiz. Jizzaxda ham doim biz bilan bo‘lishga vaqt topardi. Bizning hayotimizda faol ishtirok etgan va hozir ham etmoqda. Bu — hayratlanarli».

Prezident administrasiyasi rahbarining so‘zlariga ko‘ra, tarbiya faqat shaxsiy namuna orqali bo‘ladi.

«Bolalarni faqat namuna ko‘rsatib tarbiyalash mumkin. Ularni boshqa yo‘l bilan — eng zo‘r o‘qituvchilar, eng zo‘r maktablar bilan — to‘g‘ri inson qilib tarbiyalab bo‘lmaydi. Bu ish bermaydi. Ona, ota va shaxsiy namuna — mana shu ish beradi, tamom».

«Vatanni sevish kerak — vassalom»

Prezidentdagi energiya manbai haqidagi savolga javob berarkan, u bu savolni otasiga tez-tez berib turishini tan oldi.

«Chunki mening o‘zim charchab qolaman, axir men u kishining yonidaman-ku. Jismonan charchayman, ba’zan hammasiga qo‘l siltab, qochib ketgim keladi. Ularning esa bu savolga javoblari bitta: «Vatanni sevish kerak — qisqa va lo‘nda. Vatanni sevish kerak — vassalom».

Uning so‘zlariga ko‘ra, aynan shu narsa prezidentga intilish uchun turtki beradi. «U qisqa vaqt ichida imkon qadar ko‘proq natijaga erishishni xohlaydi».

«Masalan, men charchayman. Yonimizdagi jamoa charchaydi. Lekin u kishida mana shu narsa bor… Menimcha, bu qandaydir ilohiy xislat. Men Xudoga, taqdirga ishonaman. Ishonamanki, Alloh bizni yerga tushirishdan oldin o‘zi belgilagan maqsadlarga erishishimiz uchun bizni ma’lum xislatlar bilan siylaydi. Men Xudo maqsadlarni biz tug‘ilishimizdan oldin belgilashiga ishonaman. Va sening KPI`ingga qarab, keyin sen bilan va sening ruhing bilan nima sodir bo‘lishi hal bo‘ladi», — dedi Saida Mirziyoyeva.

U (Saida) to‘qqiz yil ichida qanday o‘zgardi?

2026 yil yanvaridagi o‘zini 2016 yil yanvaridagi holati bilan qanday solishtirishi haqidagi savolga Saida Mirziyoyeva o‘zgarishlar katta bo‘lganini aytdi.

«Ortiq sabrliroqman, menda sabr-toqat ko‘paydi, impulsivlik (qiziqqonlik) kamaydi. Men buni katta yutuq deb bilaman». U vaqt o‘tishi bilan voqeliklarga kengroq miqyosda qaray boshlaganini qo‘shimcha qildi.

«Dadam mamnun bo‘lishini xohlayman»

O‘zi ham shunday rolni va shunday miqyosdagi mas’uliyatni xohlaydimi, degan savolga Saida Mirziyoyeva shunday javob berdi:

«Men dadam mamnun bo‘lishini xohlayman. U kishi esa qachonki barcha orzulari amalga oshsagina baxtli bo‘la oladi. Orzulari esa ulkan, masshtabli. Va ular faqat va faqat xalq bilan bog‘liq».