Saida Mirziyoyeva ekologik vaziyatni yaxshilash haqida: "Barcha imkoniyatlarni safarbar qildik. Nima kerak bo‘lsa, prezidentdan „dobro“ oldik"

O‘zbekiston Prezidenti administrasiyasi rahbari Saida Mirziyoyeva Kirill Altmanning Alter Ego loyihasiga bergan intervyusida davlat ekologiyani himoya qilish uchun qanday safarbarlik ishlarini tashkil etgani haqida gapirdi. Barqaror samaraga erishish faqat kundalik odatlar o‘zgarganidagina — ham fuqarolar, ham biznes tomonidan — mumkin bo‘ladi, dedi u.

«Bu — natijasi darhol ko‘rinmaydigan loyihalar»

O‘z mas’uliyat doirasiga kiruvchi ijtimoiy loyihalar va ularning samaradorligini qanday baholashi haqidagi savolga javob berarkan, Saida Mirziyoyeva tashabbuslarning aksariyati uzoq muddatli ekanini qayd etdi.

«Men barcha loyihalarimni kuzatib boraman, lekin ko‘p loyihalarim juda uzoq muddatli. Aytaylik, ta’lim, tibbiyot — bular shunday loyihalarki, natijasini bugun yoki ertaga qo‘l bilan ushlab, ko‘rib bo‘lmaydi. Bunga yillar kerak», — dedi u.

Ekologiya sohasidagi tashabbuslar ham shunday loyihalar sirasiga kiradi. Poytaxtdagi noqulay ekologik vaziyat jamiyatda yillar davomida muhokama qilib kelingan. Noyabr oyi oxirida prezident havo sifatini yaxshilash bo‘yicha shoshilinch chora-tadbirlar majmuini tasdiqlagandi.

«Biz barcha imkoniyatlarni safarbar qildik. Bizga nima kerak bo‘lsa, prezidentdan „dobro“ oldik. O‘sha oqshomning o‘zidayoq u kishi qo‘llab-quvvatladi. Biz shunchaki ekologiyani eng muhim masalaga aylantirdik, barcha kuchlarni safarbar etdik va hammasini qat’iy nazoratga oldik. Esingizda bo‘lsa, reydlar va shunga o‘xshash tadbirlar bo‘ldi. Nazarimda, bularning bari shunday tezkor natijalarga olib keldi».

Ekologiya mavzusiga shaxsiy munosabati haqida gapirarkan, Saida Mirziyoyeva kundalik hayotdan misol keltirib, uning uyida havo sovib ketganda ham isitish tizimi balandlatilmasligini aytdi.

«Mana, ayni damda tashqarida havo salqin, uylarda isitish tizimlari ishlab turibdi. Men esa uyimni isitmayapman… Uyimiz nimaga buncha sovuq, degan savolga men tejash va ekologiyani asrash kerak, deb javob beraman», — dedi u.

«Biz uy issiq bo‘lishi kerak deb o‘rganib qolganmiz, aslida esa 21−23 daraja — bu ajoyib, eng maqbul harorat. Barcha shifokorlar shuni tavsiya qiladi. Bolalar ham chiniqadi», — deya qo‘shimcha qildi Saida Mirziyoyeva.

«Evropada hamma joyda odamlar uyda qalinroq kiyinib yuradi, biz esa uyda yupqa kiyinishga o‘rganganmiz — uy issiq, hatto qaynoq bo‘lishi kerak… Yaqinda Germaniyada bo‘ldim — u yerda yo‘laklar, pod’ezdlar umuman isitilmas ekan. Vannaxonalar sovuq. Koreyada bo‘ldim — dahshatli darajada sovuq, lekin madaniyat shunaqa. Menimcha, biz ham shu madaniyatga kelishimiz kerak».

«Men o‘zimdan, farzandlarimdan boshladim. Bizda hammasi uyimdan boshlanadi. Tajriba quyonchalari. Hammalari onalari islohotchi ekaniga o‘rganib bo‘lgan», — dedi u.

«Ekologiya — biznes yuritish madaniyati»

Ekologiya sohasida qabul qilingan choralar barqaror bo‘lishi va havo sifati yomonlashishi takrorlanmasligi uchun nima qilish kerakligi haqidagi savolga javoban Saida Mirziyoyeva biznes va tizimli o‘zgarishlarning rolini ta’kidladi.

«Hozir biznesga ekologiya muhim ekanini maksimal darajada o‘rgatyapmiz. Korxonalar filtrlar o‘rnatishi shart. Ekologiya muhim. Bu — shunchaki madaniyat, ham davlat, ham xususiy biznes yuritish madaniyati».

Uning aytishicha, korxonalar bilan ishlash allaqachon samara bermoqda: «Biz biznes bilan — xususiy va davlat sektori bilan — biroz ishladik. Hamma joyda filtr o‘rnatishga majbur qilyapmiz va bu natija beryapti».

«Mashinalar bilan bog‘liq vaziyat ham shunga o‘xshash. Xalq tushunishi kerak, mas’uliyatni zimmasiga olishni, o‘zidan boshlashni o‘rganishi kerak… Mashinalar bo‘yicha ham ishlaymiz», — qo‘shimcha qildi administrasiya rahbari.

«Esingizdami, kovid (pandemiyasi) paytida ekologiya qanaqa edi? Qushlar sayrardi. Musaffolik. Demak, bularning bariga erishsa bo‘ladi», — dedi u.

Saida Mirziyoyeva, shuningdek, har tong dunyo mamlakatlaridagi havo ifloslanishini ko‘rsatuvchi yirik IQAir servisini tekshirishini ma’lum qildi. Kuzning ayrim kunlarida Toshkent havo sifati bo‘yicha antireyting yetakchilari qatorida bo‘lgandi.