Rossiyaliklar endi urushmoqchi emas

Ukrainadagi rus harbiylarining deyarli to‘rtdan uch qismi (72 foizi) jangovar harakatlarni to‘xtatish tarafdori. Buni mustaqil sosiologlar guruhi va "Verstka" nashri turli bo‘linmalarning yuzdan ortiq harbiy xizmatchilari o‘rtasida o‘tkazgan so‘rovnoma ko‘rsatdi. Tadqiqot natijalariga ko‘ra, 22 foizi "g‘alaba" va "maqsadlarga erishish" uchun urushni davom ettirishga tayyor, yana 2 foizi halok bo‘lgan hamkasblari uchun qasos olishni xohlaydi, 4 foizi esa javob berishga qiynalgan.

Shu bilan birga, frontda ikki yildan ortiq vaqt o‘tkazgan "faxriylar" orasida o‘t ochishni to‘xtatish tarafdorlari 57 foizni, ikki yildan kamroq vaqt oldin jang maydoniga kirgan harbiylar orasida esa 77 foizni tashkil etadi. Shuningdek, "faxriylar"ning 19 foizi "g‘alaba"ga qadar jang qilishga tayyor, yana 10 foizi esa birinchi navbatda halok bo‘lgan hamkasblari uchun qasos olishni istaydi. Harbiylarning yarmidan ko‘pi (51 foiz) Rossiya prezidenti Vladimir Putinning "maxsus operasiya maqsadlariga" erishmasdan ham Ukrainadan qo‘shinlarni olib chiqish qarorini qo‘llab-quvvatlashini aytdi. Respondentlarning 41 foizi bunday istiqbolga salbiy munosabatda bo‘lgan. Tadqiqot ustida ishlagan sosiologning so‘zlariga ko‘ra, muddatli harbiy xizmatchilar orasida qo‘shinlarni olib chiqib ketishni so‘ralganlarning 67 foizi, safarbar qilinganlar, ko‘ngillilar va mahbuslar orasida 53-56 foizi, harbiy xizmatchilar va ofiserlar orasida esa atigi 18 foizi qo‘llab-quvvatlaydi.

So‘rov, shuningdek, harbiylar Rossiya Ukrainaga qanday maqsadlarda bostirib kirganini turlicha tushunishini ko‘rsatdi. So‘ralganlarning faqat beshdan bir qismi (21 foiz) Kreml tomonidan rasman e’lon qilingan "demilitarizasiya" va "denasifikasiya" deb atadi. Biroz ko‘proq - 22 foiz - bularning barchasi kollektiv G‘arb va NATOga qarshi turish uchun qilingan deb hisoblaydi. Harbiylarning yana 17 foizi bosqinning asosiy maqsadi sifatida Ukrainaning Rossiyaga to‘liq qo‘shilishini ko‘rsatgan. 14 foizi Putin urushni Kiyevda hokimiyatni o‘zgartirish uchun boshlaganiga ishonchi komil. Shu bilan birga, respondentlarning 13 foizi rus tilida so‘zlashuvchi aholini himoya qilish va chegaralarni himoya qilishni, yana 2 foizi hokimiyatni ushlab turishni, 2 foizi esa boyishni maqsad qilgan.

"Urushning maqsadi Putinning reytingini ko‘tarish edi, xolos. Rossiyada yil sain ahvol yomonlashib borardi. U yerda raketalar qanchalik zo‘r bo‘lmasin, biz qanchalik zo‘r bo‘lmaylik va hamma biz bilan qanday hisoblashmasin, muzlatgich televizorni mag‘lub etadi," - dedi harbiylardan biri.

Shuningdek, so‘rovda qatnashgan harbiylarning yarmidan ko‘pi (51 foiz) urushning oldini olish mumkin edi, deb hisoblaydi. 40% esa qarama-qarshi fikrda. Ushbu savolga respondentlarning 9 foizi javob berishga qiynalgan.

So‘rovning deyarli barcha ishtirokchilari tinchlik muzokaralarini u yoki bu shaklda qo‘llab-quvvatladilar. Respondentlarning atigi 15 foizi bunga qarshi chiqdi. Ularning yarmidan sal ko‘prog‘i (52 foizi) Putinning muzokaralardagi asosiy maqsadi bosib olingan hududlarni tan olish ekaniga ishonchi komil, yana 29 foizi u Ukrainada hokimiyatni o‘zgartirmoqchi, 23 foizi esa Ukrainaning NATOga qo‘shilishdan bosh tortishini asosiy vazifa deb atagan.

Muzokaralar boshlanganiga qaramay, Rossiya harbiylarida urushning tez orada tugashiga nisbatan optimizm yo‘q. Ularning yarmidan ko‘pi (54%) bir yil yoki undan ko‘proq vaqt ichida tugaydi, deb hisoblaydi. Mojaro yarim yildan keyin tugashiga 34% va undan kamroq ishonadi, 12% esa muddatlarni aytishga qiynalgan.