Rossiyada 1 martdan boshlab bolalar va o‘smirlarga energetiklar sotish taqiqlanadi

Joriy yilning birinchi martidan boshlab Rossiyada voyaga etmaganlarga energetik sotishni taqiqlovchi qonun kuchga kiradi.

Qonun Rossiyaning barcha hududlarida amal qiladi. 1 martdan boshlab bolalar va o‘smirlarga alkogolsiz tonikli ichimliklar, shu jumladan energetik mahsulotlarni sotish taqiqlanadi. Ushbu taqiq choy, qahva va ularga asoslangan ichimliklarga taalluqli emas.

Agar sotuvchi xaridorning yoshiga shubha qilsa, undan voyaga etganligini tasdiqlash uchun hujjatni taqdim etishni talab qilishga haqlidir. Agar mijoz uni ko‘rsatmasa, do‘kon xodimi sotishdan bosh tortishi shart.

Dekabr oyida Rossiya davlat Dumasi deputatlari voyaga etmaganlarga energetik sotganlik uchun jarimalar miqdorini belgilovchi qonun loyihasini taqdim qilgan:

– jismoniy shaxslar uchun 50 ming rublgacha;

– mansabdor shaxslar uchun 200 ming rublgacha;

– yuridik shaxslar uchun 500 ming rublgacha.

Bundan tashqari, ta’lim va tibbiyot tashkilotlarida energetik ichimliklarni sotish uchun javobgarlik yanada ortadi.

Ushbu muassasalarda energetiklar savdosi jismoniy shaxslar uchun 3000 rublga, mansabdor shaxslar uchun 6000 rublga, yuridik shaxslar uchun 50 000 rublgacha jarima qo‘llanishiga sabab bo‘ladi.